Shavkat Mirziyoyevning Tojikiston prezidenti Emomali Rahmon bilan o‘zaro kelishuviga asosan mamlakat hukumati delegatsiyasi 21-iyul kuni Tojikistonga tashrif buyurdi. Bu haqda bosh vazir matbuot xizmati xabar berdi.
Ma’lum qilinishicha, Dushanbe shahrida Tojikiston prezidenti Emomali Rahmon O‘zbekiston bosh vaziri Abdulla Aripov boshchiligidagi delegatsiyani qabul qilgan.
Suhbat avvalida bosh vazir Tojikiston prezidenti Emomali Rahmonga davlat rahbari Shavkat Mirziyoyevning samimiy salomi va ezgu tilaklarini yetkazgan. O‘z navbatida, Tojikiston rahbari O‘zbekiston yetakchisini va butun mamlakat xalqini prezident saylovidagi ishonchli g‘alabasi bilan yana bir bor samimiy tabriklab, tinchlik-osoyishtalik, farovonlik va ravnaq tilagan.
O‘zbekiston bosh vaziri saylovdan so‘ng Shavkat Mirziyoyevni dastlabki daqiqalarda prezident Emomali Rahmon tabriklaganini bildirib, bu qardosh Tojikiston davlati mamlakatda olib borilayotgan islohotlarni qatʼiy qo‘llab-quvvatlayotganidan dalolat ekanini qayd etgan.
Uchrashuvda oliy darajada erishilgan kelishuvlar ijrosini ta’minlash, O‘zbekiston bilan Tojikiston o‘rtasidagi ko‘p qirrali munosabatlarni, eng avvalo, savdo-iqtisodiyot, investitsiyalar, energetika, qishloq xo‘jaligi va boshqa ustuvor sohalarda amaliy hamkorlikni yanada kengaytirishga alohida eʼtibor qaratish kerakligi taʼkidlangan.
Shavkat Mirziyoyev 18-may kuni Sian shahrida o‘tayotgan Markaziy Osiyo mamlakatlari va Xitoy sammiti doirasida Tojikiston prezidenti Emomali Rahmon bilan uchrashuv o‘tkazgandi. Shuningdek, har ikki davlat rahbarlari 19-iyul kuni Markaziy Osiyo mamlakatlari va Ko‘rfaz arab davlatlari hamkorlik kengashi yetakchilarining birinchi sammitida ishtirok etgan.
Izoh (0)