Хитойнинг Шанхай шаҳрида 5-10 ноябрь кунлари еттинчи Хитой халқаро импорт маҳсулотлари кўргазмаси бўлиб ўтади. Бу ҳақда Ўзбекистон бош вазири матбуот хизмати хабар берди.
Маълум қилинишича, тадбирда фахрий меҳмон мақомида иштирок этиш учун Абдулла Арипов бошчилигидаги Ўзбекистон ҳукумати делегацияси 4 ноябрь куни Шанхайга ташриф буюрди.
Ташриф доирасида Хитой Халқ Республикаси Давлат кенгаши бош вазири Ли Сян билан учрашув ўтказилди.
Ўзбекистон томони Шавкат Мирзиёевнинг Хитой Халқ Республикаси раиси Си Цзиньпинга йўллаган самимий саломини етказди.
Учрашувда савдо-иқтисодий ҳамкорлик ривожланиб бораётгани қайд этилди. Хусусан, 2023 йилда савдо айланмаси 14 млрд долларга етди.
Икки давлат раҳбарлари ҳукуматлар зиммасига унинг ҳажмини 20 млрд долларга етказиш вазифасини қўйган. Мазкур топшириқ ижросини таъминлашда барча имкониятлар мавжудлиги, бунинг учун эса ўзаро саъй-ҳаракатлари бирлаштириш лозимлиги билдирилди.
Учрашувда савдо-иқтисодий, инвестициявий, молиявий, саноат, инфратузилма, транспорт-логистика, “яшил” энергетика, тоғ-кон саноати, қишлоқ хўжалиги, тўқимачилик, IT, таълим, туризм, ҳудудлараро ва маданий-гуманитар ҳамкорликни ривожлантириш масалалари юзасидан ҳам атрофлича фикр алмашилди.
Шанхайга ташриф доирасида Шанхай шаҳри Партия қўмитаси котиби Чен Сзинин ҳамда “Ҳенан инвестмент Group”, “Чина Датанг Group”, “Шанхи Тианҳаи Group” сингари Хитойнинг йирик компаниялари раҳбарияти билан ҳам учрашувлар ўтказилди.
Изоҳ (0)