Surxondaryo viloyatida yashovchi fuqaro T.M. bank kartasidan 22 million so‘m pulini noma’lum shaxs o‘zlashtirib olgani yuzasidan IIOga ariza bilan murojaat qilgan. Bu haqda Kiberxavfsizlik markazi axborot xizmati xabar bermoqda.
Ma’lum qilinishicha, gumonlanuvchi sifatida tergov harakatlariga jalb etilgan M.O. jabrlanuvchi bilan Telegram messenjeridagi “Abusaxiy optom” nomli guruh orqali tanishgan.
Gumonlanuvchi shaxs o‘zini “Abu Saxiy” bozorida erkaklar kiyim-kechaklarini ulgurji narxlarda sotuvchi tadbirkor sifatida tanishtiradi va T.M.ga xarid qilgan kiyim-kechaklarni yetkazib berishini aytib aldaydi hamda oldindan 22 million so‘m miqdoridagi pulni taksi orqali olishga o‘zaro kelishadi.
Shundan so‘ng taksi haydovchisi Surxondaryo viloyatidan Toshkent shahriga olib kelgan mazkur pullarni aravakash yordamida olib, Paynet shoxobchasi orqali o‘zining bank kartasiga o‘tkazadi. Keyin yozishmalarni o‘chirib, qo‘ng‘iroqlarga javob bermay, jabrlanuvchini “qora ro‘yxat”ga kirgizib qo‘yadi, deyiladi markaz axborotida.
Mazkur holat yuzasidan ayblanuvchiga nisbatan Jinoyat kodeksining 168-moddasi (firibgarlik) 3-qismi bilan jinoyat ishi qo‘zg‘atilgan.
Agar ayblanuvchining qilmishi isbotlansa, u bazaviy hisoblash miqdorining uch yuz baravaridan (112 million 500 ming so‘m) to‘rt yuz baravarigacha (150 million so‘m) miqdorda jarima yoki ikki yildan uch yilgacha axloq tuzatish ishlari yoxud muayyan huquqdan mahrum etilgan holda besh yildan sakkiz yilgacha ozodlikdan mahrum qilish bilan jazolanadi.
Izoh (0)