Сурхондарё вилоятида яшовчи фуқаро Т.М. банк картасидан 22 миллион сўм пулини номаълум шахс ўзлаштириб олгани юзасидан ИИОга ариза билан мурожаат қилган. Бу ҳақда Киберхавфсизлик маркази ахборот хизмати хабар бермоқда.
Маълум қилинишича, гумонланувчи сифатида тергов ҳаракатларига жалб этилган М.О. жабрланувчи билан Telegram мессенжеридаги “Абусахий оптом” номли гуруҳ орқали танишган.
Гумонланувчи шахс ўзини “Абу Сахий” бозорида эркаклар кийим-кечакларини улгуржи нархларда сотувчи тадбиркор сифатида таништиради ва Т.М.га харид қилган кийим-кечакларни етказиб беришини айтиб алдайди ҳамда олдиндан 22 миллион сўм миқдоридаги пулни такси орқали олишга ўзаро келишади.
Шундан сўнг такси ҳайдовчиси Сурхондарё вилоятидан Тошкент шаҳрига олиб келган мазкур пулларни аравакаш ёрдамида олиб, Paynet шохобчаси орқали ўзининг банк картасига ўтказади. Кейин ёзишмаларни ўчириб, қўнғироқларга жавоб бермай, жабрланувчини “қора рўйхат”га киргизиб қўяди, дейилади марказ ахборотида.
Мазкур ҳолат юзасидан айбланувчига нисбатан Жиноят кодексининг 168-моддаси (фирибгарлик) 3-қисми билан жиноят иши қўзғатилган.
Агар айбланувчининг қилмиши исботланса, у базавий ҳисоблаш миқдорининг уч юз бараваридан (112 миллион 500 минг сўм) тўрт юз бараваригача (150 миллион сўм) миқдорда жарима ёки икки йилдан уч йилгача ахлоқ тузатиш ишлари ёхуд муайян ҳуқуқдан маҳрум этилган ҳолда беш йилдан саккиз йилгача озодликдан маҳрум қилиш билан жазоланади.
Изоҳ (0)