Ijtimoiy tarmoqda “O‘zbekiston” sanatoriylari (Ukraina, Yalta shahri – Rossiya, Kislovodsk shahri) faoliyatini qayta tiklash va modernizatsiyalash jamoat fondi (keyingi o‘rinlarda – Jamoat fondi) senator Odiljon Iminovga tegishli bo‘lishi mumkinligi va shunday bo‘lgan taqdirda bu “O‘zbekiston Respublikasi Oliy Majlisi Qonunchilik palatasi deputatining va Senati a’zosining maqomi to‘g‘risida”gi qonuniga ko‘ra senatorning vakolatlari muddatidan ilgari tugatilishiga sabab bo‘lishi bayon etilgan.
Mazkur xabarlar yuzasidan Senat axborot xizmati “Daryo.uz”ga izoh berdi. Aytilishicha, Jamoat fondi 2008-yilda tashkil etilgan (2010-yilda qayta tashkil etilgan) hamda Adliya vazirligi tomonidan ro‘yxatga olingan. 2008 – 2018-yillar davomida Odiljon Iminov ushbu Jamoat fondiga rahbarlik qilib kelgan.
Markaziy saylov komissiyasining 2018-yil 27-martdagi 868-sonli qarori bilan Odiljon Iminov Oliy Majlisi Senati a’zosi etib ro‘yxatga olingan. Shundan so‘ng, u Senatning Byudjet va iqtisodiy islohotlar masalalari qo‘mitasi raisining o‘rinbosari etib saylangan.
Qayd etish joizki, Senatda doimiy asosda ishlovchi senator o‘z vakolatlari davrida ilmiy, ijodiy va pedagogik faoliyatdan tashqari haq to‘lanadigan boshqa turdagi faoliyat bilan shug‘ullanishi mumkin emasligi nazarda tutilgan.
Shunga asosan Jamoat fondi rahbarining 2018-yil 30-martdagi 5-sonli buyrug‘iga asosan Odiljon Iminov 2018-yil 2-apreldan boshlab Senat a’zoligi davrida jamoatchilik asosida (maoshsiz) ishlashga o‘tkazilgan. Uning vazifalari esa direktor o‘rinbosari zimmasiga yuklatilgan.
Ushbu buyruqqa asosan Odiljon Iminov bugungi kunga qadar Jamoat fondida jamoatchilik asosida faoliyat yuritib kelmoqda, deyiladi Senat axborotida.
Ma’lumot uchun, Senatda doimiy asosda ishlovchi senator haq to‘lanadigan tegishli turdagi faoliyat bilan shug‘ullanishga yo‘l qo‘yilmasligi to‘g‘risida ogohlantirish olganidan keyin haq to‘lanadigan boshqa turdagi faoliyat (ilmiy, ijodiy va pedagogik faoliyatdan tashqari) bilan shug‘ullangan taqdirda vakolatlari muddatidan ilgari tugatilishiga oid norma 2024-yil 2-iyuldagi qonuniga asosan kiritilgan.
Izoh (0)