Toshkent shahrida 30-noyabr kuni “O‘zbekiston” xalqaro anjumanlar saroyida Barqaror rivojlanish maqsadlarini amalga oshirishda parlamentlararo hamkorlik bo‘yicha II Global forumi bo‘lib o‘tdi.
Anjuman ishida parlamentlararo hamkorlik, gender va yoshlar siyosati hamda parlament va fuqarolik jamiyati o‘rtasidagi o‘zaro hamkorlik mavzularidagi uchta sessiya bo‘lib o‘tdi.
Parlamentlararo ittifoq bosh kotibi Martin Chungong anjuman ishtirokchilariga videomurojaat qildi. U taklif va xulosalar parlament hamda fuqarolik jamiyati institutlari faoliyatiga ijobiy taʼsir qilishini taʼkidlab o‘tdi.
Global forumda BMT Bosh assambleyasining “Barqaror rivojlanish maqsadlariga erishishda fuqarolik jamiyati ishtirokini kengaytirish to‘g‘risidagi” rezolyutsiyasi loyihasi muhokama qilinishi katta voqelik. Bu rezolyutsiyaning tashabbuskori bo‘lgan O‘zbekistonga bu tashabbus va qatʼiyat uchun minnatdorchilik bildiraman, — dedi Martin Chungong.
Oliy Majlis Senati raisi Tanzila Norboyeva kirish so‘zida ushbu siyosiy forum mamlakatlarning erishgan natijalarini xalqaro hamjamiyatga yetkazishda, o‘zaro tajriba almashishda muhim muloqot maydoni bo‘lib xizmat qilayotganini aytib o‘tdi,
Albatta, bugungi natijalar bizga kifoya, shu bilan qanoatlanib qolamiz, degan fikrdan yiroqmiz. Oldimizda hali turgan vazifalar yetarlicha.
Ayniqsa, fuqarolik jamiyat institutlarining rivojlanish darajasi hali bizni qoniqtirmaydi. Milliy maqsadlarga erishishda, jamiyatdagi masʼuliyat va safarbarlik hissini yanada kuchaytirishimiz lozim. Xususan, BMT bosh kotibi Antoniu Guterrish taʼkidlaganidek, fuqarolik jamiyati va xususiy sektor vakillari barqaror rivojlanish maqsadlariga erishish yo‘lida kurashga safarbar bo‘lishlari kerak.
O‘zbekistonda barqaror rivojlanish doirasida o‘tkazilayotgan tadbirlar ham eng avvalo ushbu maqsadlarga yo‘naltirilgan, — dedi Tanzila Norboyeva.
Birlashgan Millatlar Tashkiloti Taraqqiyot dasturining O‘zbekistondagi doimiy vakili Ram Aer aytishicha, anjumanda taʼlim tizimi samaradorligini oshirish, ayniqsa, inklyuziv taʼlimga eʼtibor, kambag‘allikka barham berish bo‘yicha muhim fikr-mulohazalar bildirildi.
.png)
Bugungi ikkinchi global forum ishtirokchilari o‘z faoliyatlari davomida amalga oshirayotgan ishlari haqida maʼlumotlar berish bilan birga, o‘zaro tajriba almashish imkoniga ega bo‘ldi. Bularni amalga oshirish odamlar manfaatiga xizmat qiladi. Mana shunday xayrli maqsadlarni biz ham qo‘llab-quvvatlaymiz. Taʼlim rivojida nanotexnologiyalardan kengroq foydalanish maqsadga muvofiq, — dedi Ram Aer.
Tadbir davomida O‘zbekistonda faoliyat yuritayotgan nodavlat notijorat tashkilotlari tashabbusi bilan ilgari surilayotgan “Barqaror rivojlanish maqsadlariga erishishda fuqarolik jamiyati institutlari ishtirokini kengaytirish to‘g‘risida”gi BMT Bosh assambleyasining rezolyutsiyasi loyihasini BMTda ilgari surish taklifi barcha ishtirokchilar tomonidan qo‘llab-quvvatlandi.
Barqaror rivojlanish maqsadlari nima?
Barqaror Rivojlanish Maqsadlari, yoki Global maqsadlar deb nomlanib, qashshoqlikni yo‘q qilish, sayyorani himoya qilish va barcha odamlarga tinchlik va farovonlik olib kelishga qaratilgan universal choralardir.
Maqsadlar BMTga a’zo barcha davlatlar, shu jumladan, O‘zbekiston tomonidan 2015-yil sentyabr oyida ma’qullangan. Ularga 2030-yilga qadar erishilishi kerak bo‘lgan 17 ta maqsad kiritilgan. O‘zbekiston 17 ta maqsadga erishish bo‘yicha 16 maqsadni qabul qilgan. Qolgan bitta maqsad dengiz yo‘li bilan bog‘liq bo‘lgani uchun mamlakatga tegishli emas.
Izoh (0)