O‘zbekiston Parlamentlararo Ittifoqning 2021-yilgi “Siyosatdagi ayollar” jahon reytingida 45-o‘rinni egalladi, deb xabar bermoqda UzNews. Reytingda ayollarning turli mamlakatlar parlamenti va hukumatidagi vakilligi haqidagi ma’lumotlar ko‘rsatilgan.
O‘zbekiston bu borada 130 dan ortiq davlatlar, jumladan, Germaniya, Avstraliya, Kanada, AQSh, Markaziy Osiyoning barcha davlatlari va boshqalarni ortda qoldirdi.
Bundan tashqari, O‘zbekiston ayollar parlamentni boshqaradigan va hukumat tarkibiga kiradigan mamlakatlar ro‘yxatiga kiritilgan. Shuningdek Senat raisi Tanzila Norboyeva rahbarlik qilayotgan Gender tenglikni ta’minlash masalalari bo‘yicha komissiya ishiga yuqori baho berilgan.
1889-yilda tashkil etilgan Parlamentlararo Ittifoq 179 mamlakat parlamentlarini birlashtirgan parlamentlararo muloqot uchun eng katta platformadir. Tashkilotda, shuningdek, mintaqaviy parlament organlarining 13 ta assotsiatsiyalangan a’zolari mavjud.
O‘z navbatida O‘zbekiston ham 1992-yildan Parlamentlararo Ittifoq a’zosi hisoblanadi. Garchi mamlakatning a’zoligi 2007—2017-yillarda to‘xtatilgan bo‘lsa-da, 2017-yilda Toshkent Parlamentlararo ittifoqdagi ishtirokini yana tikladi.
2019-yil oktabr oyida Oliy Majlis Qonunchilik palatasi spikerining birinchi o‘rinbosari Akmal Saidov 2020—2022-yillarga Parlamentlararo Ittifoqning Yevrosiyo guruhidan Parlamentlararo Ittifoqning ijroqo‘mi a’zosi etib saylangan edi. 2020-yil 30-yanvar kuni Parlamentlararo Ittifoq ijroiya qo‘mitasi boshqaruv organlari yangi tarkibini shakllantirish doirasida PAI vitse-prezidenti hamda moliya bo‘yicha kichik qo‘mita a’zosi etib ham tayinlandi.
Izoh (0)