“Afrosiyob” poyezdi biror yil daromad ko‘rib ishlamagan, faqat zarar bilan ishlagan. Bu haqda “O‘zbekiston temir yo‘llari” aksiyadorlik jamiyati boshqaruv raisi Zufar Narzullayev Senatning ellik sakkizinchi yalpi majlisda ma’lum qildi.
Majlisda senator Abdurahim Erkayev tezyurar poyezd chiptalarining narxi samolyot chipta narxlaridan qimmat bo‘lib ketganini aytdi. Uning e’tiroziga javoban Zufar Narzullayev bunday holat normal ekani, dunyo miqyosida ham shunday tartib joriy etilganini ta’kidladi.
“ ‘Afrosiyob’ o‘tgan yilning o‘zida 238 milliard so‘m zarar ko‘rgan. Yevropada, umuman, jahon miqyosida tezyurar poyezdlarning chipta narxi samolyot va oddiy poyezdlar narxidan qimmat yuradi. Oddiy poyezdlarning chipta narxi ma’lum bir belgilangan tarif asosida ushlab turiladi.
Kelasi yil yanvar oyidan yangi dastur ishga tushirilmoqda. Kelajakda tezyurar poyezd chiptalari narxi samolyotlarning chipta narxlari bilan teng bo‘lishi kutilmoqda. Bu dasturda poyezd chiptasi narxi xuddi samolyot chiptasi narxlari kabi o‘zgarib turadi”, dedi “O‘zbekiston temir yo‘llari” rahbari.
Uning qo‘shimcha qilishicha, qolgan oddiy poyezdlarning chipta narxlari Iqtisodiyot va moliya vazirligi bilan kelishilgan holda tartibga solinadi.
Avvalroq transport vaziri Ilhom Mahkamov shu vaqtgacha barcha yo‘lovchi tashish xizmati tariflari monopol xizmat bo‘lgani va monopol reyestrda ishtirok etgani uchun Iqtisod va moliya vazirligi hamda Monopoliyaga qarshi kurashish qo‘mitasi bilan kelishilgan holda belgilanganini aytgandi.
Izoh (1)
Agar chiptalarning sotuvi korrupsiyasiz yolga qo'yilsa ortiqcha kazzoblar aralashmasa , bor chipta yoq deb turibman albatta foyda ko'rmaysiz , yashasin shaffoflik, korrpusion sxemalarni DXX YOKI BOSH PROKURATURA FOSH QILSIN . SHUNDA FOYDA KORINADI