Florida shahrida yashovchi 68 yoshli nafaqaga chiqqan ayol uch yil davom etadigan dunyo bo‘ylab kruiz sayohati xarid qildi. Kruizda ishtirok etish uchun ayol o‘zining bor mol-mulki va uyini sotib yubordi, ammo sayohat paytida uning WhatsApp ilovasidagi shaxsiy xabarlari tarqalib ketganidan keyin keksa ayolni kemadan haydab yuborishdi. Endilikda unga bortga chiqishga ruxsat berilmaydi, deb yozadi Daily Mail.
Ikki farzand onasi, muqaddam ajrashgan Jenni Feniks ismli ayol Yevropa, Osiyo va Amerika qit’alari bo‘ylab suzib o‘tadigan Villa Vie Odyssey kemasida sayohat qilishga qaror qildi. Buning uchun nafaqaxo‘r 350 ming dollar to‘ladi.
Feniks bilan birga mingdan ortiq yo‘lovchilar ham ushbu sayohatda ishtirok etishi lozim edi. Kema turli qit’alar bo‘ylab 375 ta shaharda to‘xtashi, dunyoning 13 ta mo‘jizasini ziyorat qilishi kerak edi. Kruizing rasmiy veb-saytida mehmonlar hashamatli xonalarda yashashi, kir yuvish joylari, sog‘lomlashtirish markazi, turli salonlar va xordiq chiqarish xonalari bilan ta’minlanishi qayd etilgan.
Shuningdek, kruiz vaqtida turli mavzuda ma’ruzalar o‘qilishi, kinoteatr va bayramlar tashkil qilinishi ham va’da berilgan edi. Ammo sayohatchilarning quvonchi uzoqqa cho‘zilmadi. Kema ta’mirlash ishlari uchun Belfast portiga kelib to‘xtadi. Natijada barcha yo‘lovchilar kabi Jenni Feniks bir necha oy Irlandiyada o‘z hisobidan qolib ketdi.
Va’da qilingan shart-sharoitlar yaratilmagani va sayohat uzoq vaqtga to‘xtab qolgani tufayli norozi bo‘lgan yo‘lovchilardan biri Jenni Feniks WhatsApp messenjeri orqali sayohatchilar guruhiga o‘z shikoyatlarini bildirgan. Unda ayol kemaning holatidan xavotirlanayotgani va kema dengizga chiqqandan keyin ham ta’mirlash ishlari davom etishi kerakligini bilib qolgani haqida xabar bergan. Buning ustiga, uning kabinasi ekipaj tomonidan vaqtincha band qilib qo‘yilgani haqida ham yozgan.
Messenjerdagi shaxsiy suhbatlar noma’lum shaxslar tomonidan Villa Vie Residences kemasi egalariga yetkazildi va kompaniya ayol bilan shartnomani bekor qilishga qaror qildi.
“Sizning doimiy shikoyatlaringiz yo‘lovchilarning kayfiyatiga salbiy ta’sir qilmoqda. Shu sababli biz kruizdagi ishtirokingizni bekor qilishga majburmiz”, dedi kompaniyaning bosh operatsion direktori Keti Villalba.
Jenni Feniks bu qarordan hayratda qoldi. Ammo ayol hech qachon hech kimga qo‘pollik yoki hurmatsizlik qilmaganini va shaxsiy yozishmalarini ijtimoiy tarmoqlarda chop etilmaganini ta’kidladi. Ayol faqatgina norozi bo‘lgan sayohatchilardan biri ekanini aytdi.
Qarshiliklarga qaramay, Feniksni kemadan tushirib qoldirishdi va unga sayohatdan tushgan pulning bir qismi qaytarib berildi. So‘ng ayol Floridaga qaytishga majbur bo‘ldi. Hozirda Jenni xonim qizining uyida vaqtichalik yashamoqda.
Izoh (0)