“O‘zbekiston temir yo‘llari” 2024-yilning 24-sentyabrdan boshlab Toshkent—Moskva—Toshkent yo‘nalishida yo‘lovchi poyezdlari qatnovi yo‘lga qo‘yilganini e’lon qildi.
Qayd etilishicha, ushbu qatnov yo‘lovchilarning talabi va ularga qo‘shimcha qulaylik yaratish maqsadida yo‘lga qo‘yilgan bo‘lib, haftada bir marotaba amalga oshiriladi.
COVID-2019 tufayli 2020-yil 16-mart oyidan boshlab, “O‘ztemiryo‘lyo‘lovchi”ning xalqaro yo‘nalishlarda harakatlanadigan barcha yo‘lovchi poyezdlari, xususan, Qozog‘iston va Rossiyaning bir nechta yirik shaharlariga, jumladan, Toshkent—Moskva—Toshkent yo‘nalishidagi yo‘lovchi poyezdlari harakati ham to‘xtatilgan edi. 2022-yildan boshlab esa xalqaro yo‘nalishlarda yo‘lovchi poyezdlar qatnovi bosqichma-bosqich tiklana boshladi.
24-sentyabr kuni soat 19:55 da 505-sonli Toshkent—Moskva poyezdi Toshkent-Markaziy temiryo‘l vokzalidan kuzatildi. Ushbu tarkib Qozog‘istonning “Sariog‘och”, “Aris”, “Timur”, “Turkiston”, “Yangiqo‘rg‘on”, “Shiyeli”, “Qizilo‘rda”, “Josali”, “Toretam”, “Kazali”, “Aral”, “Sekseul”, “Shalkar”, “Jem”, “Kandiagach”, “Aktobe” hamda “Jaysan” temiryo‘l vokzallarida, Rossiyaning “Ilesk”, “Orenburg”, “Sorachinsk”, “Buzuluk”, “Samara”, “Ryazan-1”, “Kuznesk”, “Penza-1”, “Marjansk”, “Ryask-1”, “Skopin” vokzallarida to‘xtab o‘tadi.
So‘nggi manzil — Moskva poytaxtidagi “Pavelesskiy” temiryo‘l vokzaliga 27-sentyabr kuni soat 23:12 da (Moskva vaqti bilan) yetib boradi. Moskva—Toshkent yo‘nalishidagi 506-sonli poyezd qatnov esa 28-sentyabr kuni Moskva vaqti bilan soat 05:40da “Pavelesskiy” vokzalidan harakatni boshlaydi va 1-oktyabr kuni Toshkent vaqti bilan 08:25 da yetib keladi.
Ushbu xalqaro yo‘nalishlardagi qatnovlar uchun chegirmalar tashkil etilgan bo‘lib, qatnov sanasidan qancha ko‘p kun oldin chipta xarid qilinsa, chegirma foizi shuncha yuqoriroq bo‘ladi. Chegirma foizi va narxlari bilan quyidagi havola orqali tanishish mumkin.
Izoh (0)