Raqobat qo‘mitasi “O‘ztemiryo‘lyo‘lovchi” AJ va “Shahar atrofida yo‘lovchi tashish” MCHJ tomonidan iste’molchilardan 1,3 milliard so‘mga yaqin ortiqcha undirilgan to‘lovlarni qaytarishi yuzasidan ko‘rsatma berib, moliyaviy jarima qo‘llagandi. “O‘ztemiryo‘lyo‘lovchi” bunga munosabat bildirdi.
![](/static/2024/08/22/photo_2022-04-08_16-18-17-B0pgLiuT.jpg)
Qo‘mita xabarida “O‘ztemiryo‘lyo‘lovchi” AJ Farg‘ona filiali (bo‘linmasi) tomonidan temir yo‘l vokzali (stansiyalari) bo‘ylab 2023-yil davomida 606 380 ta sotilgan chiptalardan vositachilik yig‘im qiymati bo‘yicha 660 million so‘mga yaqin ortiqcha haq undirilgani aniqlangani ko‘rsatilgandi.
Munosabatda bildirilishicha, “O‘ztemiryo‘lyo‘lovchi” AJning 2023-yil uchun hisobot hujjatlariga asosan Farg‘ona filialida shu davr mobaynida shaharlararo va shahar atrofida harakatlangan 220 740 nafar yo‘lovchilarga pullik xizmatlar ko‘rsatilgan.
“O‘zbekiston Respublikasi temir yo‘l transportida yo‘lovchilar, bagaj va yuk bagaj tashish qoidalari”da “Shaharlararo yo‘lovchi tashish poyezdlaridagi chiptaning to‘liq qiymati, ushbu poyezdlarni tashkil etish va xizmat ko‘rsatish bilan bog‘liq amaldagi harajatlarni hisobga olgan holda belgilanadi, O‘zbekiston Respublikasi va Toshkent shahar moliya boshqarmalari tomonidan ko‘rib chiqiladi va tasdiqlanadi”, deb belgilangan.
“O‘ztemiryo‘lyo‘lovchi” matbuot xizmati munosabatida aytilishicha, mazkur filial shaharlararo yo‘lovchi poyezdlar chipta narxi 8 yil mobaynida o‘zgarishsiz qolgan bo‘lib, hozirgi kunda Qo‘qon—Marg‘ilon—Andijon yo‘nalishi 12 000 so‘m qilib belgilangan. Lekin har bir yo‘lovchi uchun tashish harajati 30 000 so‘mni tashkil qiladi, yaʼni harajatlar yuqoridagi narx bilan umuman qoplanmaydi.
“O‘ztemiryo‘lyo‘lovchi" AJ Farg‘ona filiali tomonidan moliya boshqarmasida chiptaning tarif qiymati tasdiqlatilgan bo‘lib, vositachilik yig‘imi (3 000 so‘m) tashuvchi tomonidan mustaqil belgilangan, deyiladi munosabatda.
Qayd etilishicha, mazkur holatda Farg‘ona filiali tomonidan yo‘lovchilardan asossiz pul undirilgani to‘g‘risida eʼlon qilingan xabar qo‘mitaning apellyatsiya kengashida yoki sudda ko‘rib chiqiladi.
Avvalroq narxlarni sunʼiy oshirish yo‘li bilan katta miqdorda daromad olgan “Navoiyazot” AJga nisbatan chora ko‘rilishi haqida xabar berilgandi. “Navoiyazot” mazkur qaror va ko‘rsatma ustidan sudga shikoyat qilgan. Sud ushbu shikoyatni rad etgan.
Raqobat qo‘mitasi “Lukoyl” kompaniyasiga narx manipulyatsiyasi orqali asossiz olingan mablag‘ni qaytarish majburiyatini qo‘ygandi. Ushbu kompaniya ham qo‘mitaning bu boradagi qarori ustidan shikoyat qilmoqchi.
Izoh (0)