“Афросиёб” поезди бирор йил даромад кўриб ишламаган, фақат зарар билан ишлаган. Бу ҳақда “Ўзбекистон темир йўллари” акциядорлик жамияти бошқарув раиси Зуфар Нарзуллаев Сенатнинг эллик саккизинчи ялпи мажлисда маълум қилди.
Мажлисда сенатор Абдураҳим Эркаев тезюрар поезд чипталарининг нархи самолёт чипта нархларидан қиммат бўлиб кетганини айтди. Унинг эътирозига жавобан Зуфар Нарзуллаев бундай ҳолат нормал экани, дунё миқёсида ҳам шундай тартиб жорий этилганини таъкидлади.
“ ‘Афросиёб’ ўтган йилнинг ўзида 238 миллиард сўм зарар кўрган. Европада, умуман, жаҳон миқёсида тезюрар поездларнинг чипта нархи самолёт ва оддий поездлар нархидан қиммат юради. Оддий поездларнинг чипта нархи маълум бир белгиланган тариф асосида ушлаб турилади.
Келаси йил январь ойидан янги дастур ишга туширилмоқда. Келажакда тезюрар поезд чипталари нархи самолётларнинг чипта нархлари билан тенг бўлиши кутилмоқда. Бу дастурда поезд чиптаси нархи худди самолёт чиптаси нархлари каби ўзгариб туради”, деди “Ўзбекистон темир йўллари” раҳбари.
Унинг қўшимча қилишича, қолган оддий поездларнинг чипта нархлари Иқтисодиёт ва молия вазирлиги билан келишилган ҳолда тартибга солинади.
Аввалроқ транспорт вазири Илҳом Маҳкамов шу вақтгача барча йўловчи ташиш хизмати тарифлари монопол хизмат бўлгани ва монопол реестрда иштирок этгани учун Иқтисод ва молия вазирлиги ҳамда Монополияга қарши курашиш қўмитаси билан келишилган ҳолда белгиланганини айтганди.
Изоҳ (1)
Agar chiptalarning sotuvi korrupsiyasiz yolga qo'yilsa ortiqcha kazzoblar aralashmasa , bor chipta yoq deb turibman albatta foyda ko'rmaysiz , yashasin shaffoflik, korrpusion sxemalarni DXX YOKI BOSH PROKURATURA FOSH QILSIN . SHUNDA FOYDA KORINADI