UzAutoMotors bosh direktori Bu Inge Andersson ish haqining 5 foizi miqdorida jarimaga tortildi. Bu haqda Istiqbolli loyihalar milliy agentligi korporativ axborot yagona portalida maʼlum qilingan.
Maʼlumotga ko‘ra, AJ bosh direktori UzAutoMotors Powertrain tashqi savdo operatsiyalari bo‘yicha muddati o‘tgan debitor qarzdorliklarini o‘z vaqtida bartaraf etish choralarini ko‘rmagan.
Shu bois Bu Inge Anderssonga ish haqining 5 foiz miqdorida jarima tariqasidagi intizomiy jazo chorasi qo‘llanildi.
Shvetsiyalik Bu Andersson 2021-yilning avgustida UzAutoMotors bosh direktori etib tayinlangan edi.
Bu Andersson avtomobilsozlik sohasidagi eng ilg‘or top-menejer bo‘lib, avtomobilsozlik sohasidagi faoliyatini 1987-yildan Shvetsiyaning Saab Automobile AB kompaniyasida boshlaydi.
- 1993-yildan 2009-yilgacha xarid yo‘nalishida turli rahbar lavozimlarni egallagan va 2001—2009-yillarda General Motors’ning global xarid bo‘linmasiga rahbarlik qilgan.
- 2009-yildan 2013-yilgacha “Gruppa GAZ” korxonasiga prezident etib tayinlanadi. Bu davrda Andersson “Gruppa GAZ” biznesini zarardan barqaror foydaga olib chiqishga erishadi.
- 2014-yildan 2016-yilgacha “AvtoVAZ” OAJ prezidenti etib tayinlanadi. “Gruppa GAZ”da bo‘lgani kabi, Andersson “AvtoVAZ”da ham to‘liq transformatsiyani amalga oshirdi.
Izoh (0)