O‘zbekiston Liberal-demokratik partiyasi davlat organlari sotib oladigan avtomobillar sonini cheklash tarafdori. Bu haqda “Davlat boshqaruvi va sud-huquq tizimini takomillashtirish” mavzusidagi teledebatda O‘zLiDeP vakili Bobur Bekmurodov aytib o‘tdi.
Bobur Bekmurodovga ko‘ra, davlat byudjeti va mahalliy byudjetning puli ham xalqning, soliq to‘lovchilarning puli.
“Ularni to‘g‘ri taqsimlash va ulardan oqilona foydalanish nihoyatda muhim. Men birgina misolni aytaman, ilgari davlat organlari xohlagan avtomobillarini xohlaganicha sotib olishi mumkin edi. Buni tartibga solish uchun hukumat qarori qabul qilindi. Hozirgi kunda yuqori narx chegarasi belgilandi. Shuning o‘zi ham katta narsa, aslida. Lekin biz bunda to‘xtamoqchi emasmiz. Biz nafaqat yuqori narx chegarasi, balki sonini ham cheklamoqchimiz”, deydi O‘zLiDeP vakili.
Bekmurodov nafaqat avtomobillar, umuman qimmatbaho narsalarning soni va yuqori narx chegarasi belgilab qo‘yilishini aytdi.
“Buni biz qonunchilikda qilmoqchimiz. Xorijiy tajribani qaraydigan bo‘lsak, Germaniyani deymizmi, Singapurdami, davlat xarajatlari juda ham qatʼiy nazorat qilinadi”, deya qo‘shimcha qiladi u.
Izoh (0)