Ijtmoiy tarmoqlarda “Faringo forte” savdo nomidagi sprey ishlab chiqarish jarayoni bilan bog‘liq turli videolar tarqalib, muhokamalarga sabab bo‘ldi. SSV huzuridagi Farmatsevtika mahsulotlari xavfsizligi markazi bunga munosabat bildirdi.
Unda aytilishicha, dori vositasi ekanligi aytilayotgan “Faringo forte” savdo nomidagi mahsulot aslida dori vositasi sifatida davlat ro‘yxatidan o‘tkazilmagan va tibbiyot amaliyotida qo‘llash uchun ruxsat berilmagan.
“Shu munosabat bilan, Farmatsevtika mahsulotlari xavfsizligi markazi O‘zbekiston hududida dori vositalari va tibbiyot buyumlarining chakana savdosi bilan shug‘ullanuvchi (idoraviy mansubligidan, mulkchilik va boshqaruv shaklidan qati nazar) barcha tashkilotlar va yurtdoshlarimizni ogohlikka chaqirib, ‘Faringo forte’ mahsulotini realizatsiya qilmasligini so‘raydi”, — deyiladi xabarda.
Farmatsevtika mahsulotlari xavfsizligi markazi “Dori vositalari va farmatsevtika faoliyati” to‘g‘risidagi qonunning 20-moddasiga muvofiq, sifatsiz, qalbakilashtirilgan, O‘zbekistonda ro‘yxatdan o‘tkazilmagan dori vositalarini va tibbiy buyumlarni, shuningdek, O‘zbekistonda ro‘yxatdan o‘tkazilgan dori vositalarining g‘ayriqonuniy nusxalarini xarid qilish, chakana realizatsiya qilish hamda ulardan foydalanish taqiqlanishini eslatib o‘tdi.
Izoh (0)