O‘zbekistonda 2024-yilda budjet xodimlarining ish haqi, pensiya va stipendiyalar miqdorini oshirish rejalashtirilmoqda. Bu Iqtisodiyot va moliya vazirligi tomonidan e’lon qilingan 2024—2026-yillar uchun Budjetnomada keltirilgan.
Unda 2024–2026-yillardagi budjet siyosati konsepsiyasining asosiy yo‘nalishlari keltirilgan. Shulardan biri aholi turmush darajasini oshirish hamda fuqarolarning real daromadlari o‘sishini ta’minlash maqsadida ish haqi va pensiya miqdorlarini oshirib borishdir.
Budjetnomada keltirilishicha, kelgusi yilda ish haqi, pensiya va stipendiyalar miqdorini oshirish uchun davlat bujdetidan xarajatlari 20,5 foizga, yoki 26,94 trillion so‘mga ortishi kutilmoqda. Bu davlat budjeti barcha xarajatlarining 50 foizdan ortig‘ini tashkil etadi. Xususan, Pensiya to‘lovlari uchun xarajatlar 9,28 trillion so‘mga (+17,2 foiz) jami 63,13 trillion so‘mga oshadi.
Hujjatda keltirilishicha, 2023-yil oxirigacha shakllangan inflyatsiya miqdori yil davomida budjet tashkilotlari xodimlarining ish haqi va pensiya miqdorlarining oshirilgan foizlaridan yuqori bo‘lgan taqdirda, kelgusi moliya yilining yanvar oyidan ish haqi va pensiyalarni ushbu foizlarga oshirish orqali kompensatsiya qilish tartibi joriy etiladi.
2024-yil uchun Davlat budjeti to‘g‘risidagi qonun loyihasida respublika budjetidan birinchi darajali budjet mablag‘larini taqsimlovchilariga ajratiladigan mablag‘larning cheklangan miqdorlari keltirilgan bo‘lib, unga ko‘ra kelgusi yilda ish haqi, pensiyalar, stipendiyalar va nafaqalar miqdorlarini va ayrim xizmatlarning tariflarini oshirish bilan bog‘liq xarajatlarga 9,55 trillion so‘m ajratish ko‘zda tutilgan.
Eslatib o‘tamiz, 1-apreldan pensiya va nafaqalar, 1-maydan esa oyliklar 7 foizga oshgandi. Pensiya, nafaqa va davlat sektori xodimlarining maoshlarini 1-sentyabrdan yana 10 foizga (qo‘shimcha 5,6 trillion so‘m) oshirishi rejalashtirilgandi. Ammo budjet taqchilligi ortgani sabab bu qaror keyinga qoldirildi.
Avvalroq O‘zbekistonda 2024-yilda davlat idoralari budjetdan qancha mablag‘ olishi e’lon qilingandi.
Izoh (0)