Eron Falastinning HAMAS harakati siyosiy byurosi rahbari Ismoil Haniyaning Tehronda o‘ldirilishiga munosabatini yumshatishdan bosh tortdi, deya The Wall Street Journal (WSJ) manbalari xabar berdi.
Qayd etilishicha, Eron rasmiylari arab diplomatlariga javob zarbasi urushga olib kelishi ular uchun ahamiyatsiz ekanini aytgan.
WSJ ma’lumotlariga ko‘ra, Qo‘shma Shtatlar Yevropa va boshqa hukumatlardan Eronga eskalatsiyaga qarshi xabar yuborishni va har qanday jiddiy hujum javob choralariga olib kelishi haqida ogohlantirishni so‘ragan. Bundan tashqari, Vashington, Eronning yangi prezidentining G‘arb bilan aloqalarini yaxshilashga qaratilgan sa’y-harakatlari, agar Eron vazminlik ko‘rsatsa, ko‘proq imkoniyatga ega bo‘lishiga ishora qilgan.
Eron va HAMAS Haniyaning o‘ldirilishida Isroilni ayblagan, biroq Isroil ayblovlarga izoh berishdan bosh tortgan. Islom inqilobi qo‘riqchilari korpusi “qasos olish muqarrar” ekanini va Isroil “qattiq jazo” olishini aytgan. Axios nashri ma’lumotlariga ko‘ra, Eron 5-avgust kuni zarba berishi mumkin. Shu munosabat bilan AQSH Yaqin Sharqqa qo‘shimcha kuchlar yuborgan. Bir qator aviakompaniyalar Tel-Aviv va Bayrutga parvozlarni to‘xtatgan.
Izoh (0)