Исроил мудофаа кучлари Ливан жанубидаги “Ҳизбуллоҳ” ҳаракатининг ҳарбий мажмуасини назоратга олди, деб хабар қилди армия матбуот хизмати.
“Исроил армиясининг элита бригадаси бўлмиш Голани Марун ар-Расдаги “Ҳизбуллоҳ” жанговар мажмуасини оператив назоратга олди, бу Исроил шимолидаги аҳолига бевосита таҳдид солган”, дейилади хабарда.
Матбуот хизматининг қўшимча қилишича, жанговар мажмуа турар жой биносидан иборат бўлиб, унинг ёнида Исроилнинг шимолий аҳоли пунктларини мўлжалга олган ракеталар ўрнатилган зайтун боғи жойлашган.
Исроил қўшинлари бинодан қурол-яроғ, камуфляж тўрлари, ҳарбий жилетлар, танкка қарши ракеталар, шунингдек, ошхонада яширинган ракеталарни мусодара қилган. Ҳарбийлар, шунингдек, “Ҳизбуллоҳ” жангчилари яширинган ерости инфратузилмасини ҳам аниқлаган.
Исроил Ливан жанубида “Ҳизбуллоҳ” кучларига қарши 1 октябрдан бери қуруқликдаги операцияни олиб бормоқда. Маълумотларга кўра, ҳужумлар оқибатида мингдан ортиқ одам, жумладан, шиа ҳаракати етакчилари ҳалок бўлган, 346 мингдан ортиқ киши уйини ташлаб кетишга мажбур бўлган.
Исроилдаги ҳарбий кампаниянинг асосий мақсади бир йил аввал “Ҳизбуллоҳ” томонидан Фаластиннинг ҲАМАС ҳаракатини қўллаб-қувватлаш учун бошлаган ўққа тутилиши сабабли эвакуация қилинган шимолнинг 60 минг аҳолисини ватанга қайтариш учун шароит яратишдан иборат.
Изоҳ (0)