Ukraina prezidenti Vladimir Zelenskiy o‘z videomurojaatida birinchi marta mamlakat qurolli kuchlarining Rossiyaning Kursk viloyatidagi hujumi haqida ochiqchasiga izoh berdi.
-MK273GHd.jpg)
U, shuningdek, Ukraina Qurolli kuchlari oliy bosh qo‘mondoni Aleksandr Sirskiy unga “urushning tajovuzkorning hududiga o‘tkazilishi” haqida ma’lum qilganini aytgan.
Zelenskiyga ko‘ra, bunday harakatlar Kiyevning “adolatni tiklash” va Rossiyaga kerakli bosim o‘tkazish qobiliyatini isbotlaydi. Shu bilan birga, Zelenskiy Ukraina QK bo‘linmalarining Kursk viloyatidagi hozirgi holati va Ukraina harbiylarining keyingi rejalari haqida hech qanday ma’lumot bermagan.
Ukraina armiyasi 2024-yil 6-avgustdan buyon Kursk viloyatida harbiy operatsiya o‘tkazmoqda. Rossiya Mudofaa vazirligi va Rossiya targ‘ibot-tashviqoti Telegram-kanallari xabarlariga ko‘ra, Ukraina qo‘shinlari Rossiya chegarasi hududining bir qismini qo‘lga olib, bir necha o‘nlab kilometr ichkari tomon yurgan. Korenevskiy va Sudja tumanlarida janglar ketmoqda.
Rossiya Mudofaa vazirligi hisobotida aytilishicha, Rossiya armiyasi 24 soat davomida Ukraina qo‘shinlarining Kursk viloyatiga chuqur kirib borishga urinishlarini to‘xtatgan. Vazirlik ma’lumotlariga ko‘ra, Ukraina armiyasining Kursk viloyatiga hujum boshlanganidan beri yo‘qotishlari 1120 nafargacha harbiy xizmatchi va 140 ta zirhli texnikani tashkil etgan.
Ukrainaning to‘rt kunlik hujumi davomida 16 mingdan ortiq odam o‘z uyini tark etdi, dedi Kursk meri Igor Kutsak.
Ijtimoiy tarmoqlarda viloyat aholisi evakuatsiya ishlari yomon tashkil etilgani va mahalliy hokimiyat organlarining harakatsizligidan shikoyat qilgan.
Izoh (0)