Rossiya qo‘shinlari 8-iyul kuni ertalab Kiyev va Ukrainaning boshqa shaharlariga yirik raketa zarbasi berishi oqibatida 33 nafar kishi halok bo‘ldi, 140 nafari jarohatlandi. Bu haqda Ukraina FVV xabar berdi.
Kiyev rahbari Vitaliy Klichkoning aytishicha, 96 kishi jarohatlangan, ulardan 52 nafari kasalxonaga yotqizilgan. Ukraina IIV mamlakat bo‘ylab amalga oshirilgan yirik raketa hujumi oqibatida 31 kishi halok bo‘lgani, 125 kishi jarohatlangani haqida xabar bergan.
Kiyev harbiy ma’muriyatining ma’lum qilishicha, Solomenskiy tumanida ma’muriyat binosi, ko‘p qavatli uyning ikki qavati shikastlangan va 1500 kvadrat metr maydonda vayronagarchilik qayd etilgan. Bu yerda yetti kishi o‘limi qayd etilgan.
Kiyevda raketa hujumi natijasida Goloseyevskiy va Shevchenkovskiy tumanlaridagi uchta transformator podstansiyasi, shuningdek, elektr tarmog‘i butunlay vayron bo‘lgan yoki shikastlangan.
Shuningdek, raketa Kiyevning Shevchenkovskiy tumanidagi bolalar shifoxonasi binolaridan biriga kelib tushgan.
Ukraina SSV rahbari Viktor Lyashkoning so‘zlariga ko‘ra, raketa bolalar dializ olayotgan binoga kelib tushgan. Reanimatsiya bo‘limlari, operatsiya xonalari va onkologiya bo‘limi shikastlangan. “Oxmatdet” bemorlari shahardagi boshqa shifoxonalarga evakuatsiya qilingan.
Ukraina prezidenti devonxonasi rahbari Andrey Yermak Rossiya qo‘shinlari bolalar kasalxonasiga “maqsadli” zarba berganini ta’kidlagan.
Ushbu o‘qqa tutish tinch aholiga qarshi amalga oshirildi, ular infratuzilmaga zarba berdi. Butun dunyo bugun terror oqibatlarini ko‘rishi kerak, bunga javob faqat kuch bilan bo‘lishi mumkin, deydi Yermak.
Ukraina prezidenti Vladimir Zelenskiy shifoxonada vayronalar ostida odamlar borligini aytib, vayronalarni tozalashga shifokorlar, oddiy odamlar jalb qilinganini ma’lum qilgan.
Rossiya o‘z raketalari qayerda uchayotganini bilmay qolishi mumkin emas va odamlarga, bolalarga, umuman insoniyatga qarshi jinoyatlari uchun to‘liq javob berishi kerak. Dunyo hozir bu haqda jim turmasligi va hamma Rossiya nima qilayotganini ko‘rishi juda muhim, deya ta’kidlagan Ukraina rahbari.
Izoh (0)