14-sentabrga o‘tar kechasi Ukraina Yevpatoriya shahridagi (Qrim) rus harbiylarining havo hujumidan mudofaa tizimining muhim tarkibiy qismlaridan biri bo‘lgan S-400 “Triumf” zenit-raketa tizimini yo‘q qildi.
Tegishli operatsiya Ukraina razvedkasi va harbiy-dengiz kuchlari kontrrazvedka xodimlari tomonidan amalga oshirildi. S-400 “Triumf” dronlar va Ukrainada ishlab chiqarilgan Neptun qanotli raketalari bilan hujumga uchragan.
Manbalarning aniqlik kiritishicha, dronlar dastlab Rossiya tizimining radarlari va antennalariga zarba bergan. Radiolokatsion stansiyalar ishdan chiqqandan so‘ng, harbiy-dengiz kuchlari S-300/400 Triumf uchirish komplekslariga ikkita Neptun raketasini uchirgan.
Ukraina razvedkasi “Qrimda ruslarni yangi kutilmagan syurprizlar kutayotgani”ni qayd etdi.
S-400 “Triumf” nima?
S-400 S-300 ning takomillashtirilgan versiyasi hisoblanadi. Havo nishonlarini: strategik va taktik aviatsiya, ballistik va gipertovushli raketalar, razvedka samolyotlari, dronlarni yo‘q qilishga mo‘ljallangan. S-400 kompleksi 400 kilometr radiusdagi nishonlarga zarba bera oladi.
Tizim muhim obyektlarni himoya qila oladi, shuningdek, quruqlikdagi kuchlarni qamrab oladi. U ilk bor 2007-yilda Rossiya armiyasi xizmatiga topshirilgan. S-400 tizimining narxi 1,2 milliard dollarga baholanmoqda.
Izoh (0)