Rossiya elchixonasi joylashgan Parijning 16-okrugi deputatlari tumandagi ko‘chalardan biriga rossiyalik marhum muxolifatchi Aleksey Navalniy nomini berish taklifini bir ovozdan ma’qulladi. Bu haqda deputatlar 7-may kuni X ijtimoiy tarmog‘ida ma’lum qildi.
Marhum rossiyalik muxolifatchi nomi 16-tumandagi qaysi ko‘chaga berilishi haqida ma’lumot berilmagan. Dastlab senator Shantmes shohko‘chasiga siyosatchining nomini berishni taklif qilgan edi. Shantmes shohko‘chasi Rossiya diplomatik vakolatxonasi joylashgan Lan shohko‘chasi bilan kesishadi. Shu ikki shohko‘chaning bir chekkasida senator Navalniy xotirasiga badiiy obyekt o‘rnatish ham taklif qilingan.
Biroq taklifni tezroq qabul qilish uchun ovoz berishdan oldin uning matniga tuzatishlar kiritildi, — dedi deputatlardan biri Jyuli Boyo.
Shu bilan birga, uning so‘zlariga ko‘ra, deputatlar Shantmes shohko‘chasining nomini o‘zgartirish g‘oyasidan voz kechishmagan.
Asosiysi biz Navalniy xotirasini hurmat qilamiz, — deya qo‘shimcha qilgan u.
Yamaldagi koloniyada rossiyalik muxolifatchining o‘limi haqidagi xabardan ko‘p o‘tmay, ikki nemis jamoat tashkiloti Germaniya poytaxtidagi ko‘chalardan birini Aleksey Navalniy sharafiga o‘zgartirish tashabbusi bilan chiqqan edi.
Shu maqsadda, xususan, Berlin markazida Rossiya konsulligi joylashgan Behrenstrasse ko‘chasining bir qismi taklif qilinmoqda. Gamburg, Gaaga, Vilnyus va Yevropaning boshqa shaharlaridagi ko‘chalarga Navalniy nomini berish takliflari ham bo‘lgan.
Izoh (0)