Rossiyalik muxolifatchi Aleksey Navalniyning o‘limi bo‘yicha dastlabki tergov muddati 10 kunga, 20-aprelgacha uzaytirildi. Bu haqda Yamalo-Nenets avtonom okrugi bo‘yicha tergov boshqarmasi bildirishnomasiga tayanib, “Korrupsiyaga qarshi kurash fondi” direktori Ivan Jdanov xabar berdi.
Bildirishnomada aytilishicha, Navalniy vafot etgan kuni, 16-fevralda tergov boshlangan (bu haqda Tergov qo‘mitasining o‘zi xabar bergan). Uning materiallari asosida jinoyat ishi qo‘zg‘atishni rad etish to‘g‘risida qaror qabul qilingan edi.
Endi bu buyruq bekor qilindi, — deyiladi bildirishnomada.
Tekshiruv materiali 21-mart kuni ishlab chiqishga qabul qilingan va uni amalga oshirish muddati 30 kungacha uzaytirilgan.
Bildirishnoma o‘ta muhim ishlarni tergov qilish boshqarmasi boshlig‘ining o‘rinbosari, adliya mayori A.V. Varapaev tomonidan imzolangan. Shuningdek, Navalniyning onasi Lyudmila Navalnayaning so‘zlariga ko‘ra, o‘g‘lining jasadini yashirincha dafn qilishni talab qilgan tergovchi ham chaqirtirilgan.
Navalniyning o‘lim sabablari haqida davlatdan haligacha rasmiy ma’lumot yo‘q, — deb yozadi Jdanov.
Aleksey Navalniy Yamalo-Nenets avtonom okrugidagi koloniyada vafot etgani haqida Federal jazoni ijro etish xizmati 16-fevral kuni xabar bergan edi. O‘lim sababi tromblar yorilishi deb aytilgan, ammo bu ma’lumot tasdiqlanmagan. 17-fevral kuni koloniya xodimlari siyosatchining onasi Lyudmila Navalnayaga uning “to‘satdan o‘lim sindromi”dan vafot etgani haqida xabar bergan. Tibbiy o‘lim guvohnomasida esa siyosatchi “tabiiy sabablar” tufayli vafot etgani aytilgan.
Navalniyning jasadi 24-fevral kuni onasiga berilgan. Bundan oldin tergovchilar Navalnayani shantaj qilib, siyosatchining dafn marosimini yashirin o‘tkazishni talab qilgan. Aleksey Navalniy 1-mart kuni Moskvadagi Borisovskiy qabristoniga dafn qilingan.
Izoh (0)