Yevropa Ittifoqi rossiyalik muxolifatchi Aleksey Navalniyning o‘limi munosabati bilan Rossiya adliya tizimining bir qator vakillariga nisbatan sanksiyalar qo‘llash bo‘yicha kelishib oldi. Bu haqda tegishli manbalarga tayanib, Deutsche Welle xabar berdi.
Bunday qaror 18-mart kuni YI davlatlari tashqi ishlar vazirlari tomonidan qabul qilingan.
YI sanksiyalarni prinsipial jihatdan ma’qullagan bo‘lsa-da, qonuniy kuchga ega bo‘lgan qaror hali qabul qilinmagan. TIV yig‘ilishidan keyin o‘tkazilgan matbuot anjumanida YIning tashqi siyosat bo‘yicha rahbari Josep Borrell sanksiyalar muxolifatchining o‘ldirilishida javobgar bo‘lgan 30 nafar shaxs va tashkilotga qaratilganini aytgan.
Fevral oyi oxirida Buyuk Britaniya Navalniy o‘limiga javoban jazo choralarini joriy etgan birinchi davlat bo‘ldi. Sanksiyalarga Yamalo-Nenets avtonom okrugidagi 3-son axloq tuzatish koloniyasi rahbari Vadim Kalinin va besh nafar deputat kiritilgan. Choralar Buyuk Britaniyaga kirishni taqiqlashni va aktivlarni muzlatishni o‘z ichiga olgan. O‘sha oyda Qo‘shma Shtatlar ham Navalniyning o‘limiga javoban shaxsiy sanksiyalar kiritgan.
Navalniyning o‘limi
Navalniy Yamalo-Nenetsk avtonom okrugidagi 3-sonli axloq tuzatish koloniyasida 16-fevral kuni vafot etgan edi. O‘lim hisobotida siyosatchi tabiiy sabablarga ko‘ra vafot etgani aytilgan. Muxolifatchi tarafdorlari uning o‘ldirilganiga ishonadi. Navalniy 2021-yil boshidan beri qamoqda bo‘lgan. 2023-yil avgustida Moskva shahar sudi siyosatchini “ekstremizm” ishi bo‘yicha maxsus rejimli koloniyada 19 yillik qamoq jazosiga hukm qilgan edi.
Navalniy vafotidan so‘ng, 40 dan ortiq davlatlar fojia holatlarini mustaqil tekshirishga chaqirgan. Yevropa Ittifoqining Jenevadagi xalqaro tashkilotlar bo‘yicha vakili Lotte Knudsen Rossiya uning to‘satdan sodir bo‘lgan o‘limi yuzasidan mustaqil va shaffof xalqaro tergov o‘tkazish imkoniyatini ta’minlashi kerakligini ta’kidlagan.
17-mart kuni Rossiya prezidenti Vladimir Putin Navalniyni G‘arb davlatlarida qamoqda o‘tirgan ayrim mahbuslarga almashtirmoqchi bo‘lganini tan olgan. The Wall Street Journal nashrining yozishicha, siyosatchi Chechenistonning sobiq dala qo‘mondoni Zelimxon Xanqoshvilini o‘ldirganlikda ayblanib, Germaniyada umrbod qamoq jazosini o‘tayotgan Vadim Krasikovning Rossiyaga qaytishi bilan bog‘liq ayirboshlash uchun shaxslar ro‘yxatiga kiritilishi mumkin bo‘lgan.
Izoh (0)