Markaziy Osiyoda eng ko‘p aholi istiqomat qiladigan davlat, tarixiy Buyuk Ipak yo‘lida muhim maskan — O‘zbekiston Dubayning turizm landshaftida tobora muhim rol o‘ynamoqda.
2023-yilda Dubay O‘zbekistondan 132 mingga yaqin sayyohni qabul qildi. Bu raqam o‘tgan yilga nisbatan 56 foizga ko‘p bo‘lib, bu mamlakat turizm bozoriga qiziqish ortib borayotganidan dalolat beradi.
Dubay iqtisodiyot va turizm departamenti (DET) ushbu sur’atni mustahkamlash hamda O‘zbekistondan tashrif buyuruvchi sayyohlar sonini yanada oshirish bo‘yicha yangi strategiyalarni ko‘rib chiqmoqda. DETning Markaziy Osiyo bozorlari bo‘yicha rahbari Badir Ali Habib so‘nggi intervyusida Dubayning O‘zbekiston va boshqa rivojlanayotgan bozorlar bilan hamkorlikni kuchaytirish maqsadini bildirdi.
Rivojlanayotgan davlatlar uchun maxsus yondashuv
Habibning so‘zlariga ko‘ra, Dubay tashrif buyuruvchilarni jalb qilish uchun o‘ziga xos yondashuvni qo‘llash niyatida.
“Janubiy Osiyoda odamlar ko‘p yillardan buyon Dubayga sayohat qilishlari haqida xabaringiz bor. Biroq, biz uchun O‘zbekiston hali ham ulkan imkoniyatlarga ega hamkor. Sa’y-harakatlarimizni boshlab yubordik. Maqsadimiz kelgusi besh-o‘n yil ichida O‘zbekistondan tashrif buyuruvchilar sonini sezilarli darajada oshirishdir”, dedi Badir Ali Habib.
Bu strategiya Shayx Muhammad bin Rashid al-Maktum tomonidan Dubay iqtisodiyotini ikki baravar rivojlantirish, barqaror iqtisodiy muhitni ta’minlash, Dubayni yashash va ishlash uchun eng yaxshi global shahar sifatida o‘rnatishga qaratilgan D33 strategiyasiga o‘xshash.
Mehmonlarni jalb qiluvchi yangi tashabbus va kampaniyalar
O‘zbekistonlik sayyohlarni jalb qilish uchun Dubay kattalar uchun mehmonxona xizmati va bundan tashqari bolalar uchun bepul attraksionlardan bahramand bo‘lish imkonini beruvchi “Bolalarga bepul” aksiyasi kabi bir qancha loyihalarni ishga tushirdi.
“Ushbu kampaniya yoz oylarida ayniqsa samarali natija ko‘rsatdi”, deb ta’kidladi Habib.
Bundan tashqari, Dubay O‘zbekiston bilan hamkorlik aloqalarini mustahkamlashga ham alohida e’tibor qaratmoqda. “O‘zbekiston va Dubay o‘rtasida parvozlar sonini oshirish bo‘yicha aviakompaniyalar bilan muntazam muzokaralar olib bormoqdamiz”, dedi Habib.
Vizasiz sayohat
Yanvar oyida O‘zbekiston fuqarolari uchun viza rejimining bekor qilinishi BAA turizm sanoatini sezilarli darajada yaxshiladi.
“Joriy yilning yanvar—iyun oylari orasida o‘tgan yilning shu davriga nisbatan sayyohlar sonida 8 foiz o‘sish kuzatildi. Yilning qolgan qismida ham, ayniqsa Dubay Shopping Festivali va Dubai Fitness Challenge kabi yirik tadbirlar orqali sayyohlar soni yanadi o‘sishi kutilmoqda”, dedi Habib.
Habibning taʼkidlashicha, kelajakda O‘zbekiston bozori katta imkoniyatlar eshigi bo‘lishi mumkin. “O‘tgan yilgi 132 ming sayyoh tashrifi faqat boshlanishi. Bu sur’atni mustahkamlash va o‘sishda davom ettirish uchun harakatdamiz”, dedi u.
O‘sib borayotgan turizm landshafti
Dubayning O‘zbekistondan tashrif buyuruvchilarni jalb qilish borasidagi saʼy-harakatlari, yangi diqqatga sazovor joylar, tadbirlar va tashabbuslarni o‘z ichiga olgan keng ko‘lamli strategiyadan iborat. Toshkentdagi muhim tadbirda DET 2023-yilda o‘zbekistonlik sayyohlar soni 56 foizga oshganini e’lon qildi.
Umuman olganda, Dubay 2023-yilda 17,15 million xalqaro sayyohni qabul qildi, 2024-yilda ham o‘sish tendensiyasi davom etmoqda. Yanvardan iyungacha tashrif buyuruvchilar soni 9 foizga oshgan.
2023-yilning yoz oylarida o‘zbekistonlik tashrif buyuruvchilar soni o‘tgan yilga nisbatan 81 foizga, 2019-yilning yoziga nisbatan esa 160 foizga oshgan.
Bu o‘sishga Dubay, Toshkent va Samarqand o‘rtasidagi to‘g‘ridan to‘g‘ri reyslar ham o‘z hissasini qo‘shdi. “O‘zbekiston o‘sib borayotgan bozor va biz o‘zbek sayyohlari sonining sezilarli darajada oshganini ko‘rishdan benihoya mamnunmiz. To‘g‘ridan to‘g‘ri reyslar va vizasiz rejimning joriy etilishi ham qo‘shimcha qulaylik yaratdi. Maqsadimiz har bir o‘zbekistonlik sayyoh unutilmas taassurotga ega bo‘lishini ta’minlash”, dedi Habib.
Globallashuv va yangi ishlanmalar
Dubayning turizm sohasidagi yutuqlari xalqaro eʼtirofga sazovor bo‘ldi, shahar 2024-yil boshida ketma-ket uchinchi yil Tripadvisor Travellers’ Choice Awards tanlovida eng yaxshi sayyohlik yo‘nalishlari bo‘yicha birinchi o‘rinni egalladi. Shahar hali-haligacha o‘zining hordiq chiqarish va o‘yin-kulgi uchun global markaz maqomini saqlab qolmoqda. O‘tgan yilning oktyabr oyida Real Madrid bilan imzolangan uzoq muddatli shartnoma Dubay iqtisodiy kun tartibi, D33 doirasida shahar maqsadlarini qo‘llab-quvvatlashga qaratilgan.
Dubay, shuningdek, “Yaqin Sharq va Shimoliy Afrikaning 50 ta eng yaxshi restorani” kabi nufuzli reytinglarida o‘z o‘rniga ega. Bundan tashqari 2022-yildan beri Dubay “Mishlen qo'llanmasi”ning mezboni. Kids Go Free aksiyasida ishtirok etuvchi 100 dan ortiq mehmonxonalarni o‘z ichiga olgan Dubai Summer Surprises va Dubay Shopping Festivali kabi tadbirlar yil davomida xalqaro mehmonlarni jalb qilishda davom etmoqda.
Barqaror strategiya
Birlashgan Arab Amirliklarining 2024-Barqarorlik yiliga muvofiq, Dubay turizm va mehmondo‘stlik sohalarida turli dastur va tashabbuslar orqali barqaror o‘sishga intilmoqda. “Hayot uchun” kampaniyasi bilan Dubai Can loyihasi ikki yil ichida 500 ml hajmdagi plastik butilkalar sonini 18 millionga qisqartirdi. Ayni paytda, Dubai Reef loyihasi dunyodagi eng katta dengiz rifini yaratish, baliq zaxiralari va dengiz bio xilma-xilligini oshirishga qaratilgan.
Innovatsion strategiyalar, maqsadli kampaniyalar va barqaror strategiyalar bilan Dubay O‘zbekiston bilan o‘sib borayotgan aloqalarni mustahkamlash, turizmda uzluksiz o‘sishni ta’minlash va ikki mintaqa o‘rtasidagi dinamik munosabatlarni rivojlantirishga tayyor.
To‘liq videoni tomosha qiling:
Izoh (0)