“Davlatlarimiz o‘rtasida o‘zaro kelishuvlarga erishilayotgan bir vaqtda qonunlarimiz bir-biriga zid bo‘lmasligi lozim” — Tanzila Norboyeva

Bugun, 12 sentyabr kuni Xiva shahrida boshlangan Markaziy Osiyo davlatlarining ikkinchi parlamentlararo forumida senat raisi Tanzila Norboyeva O‘zbekiston parlamentining takliflarini aytib o‘tdi.

Mamlakatlarimiz qonunchiliklarini uyg‘unlashtirish bo‘yicha faoliyatimizni muvofiqlashtirishimiz kerak. Davlatlarimiz o‘rtasida ko‘plab sohalarda o‘zaro kelishuvlarga erishilayotgan bir vaqtda qonunlarimiz bir-biriga zid bo‘lmasligi lozim.

Bunda parlamentlararo guruhlar va komissiyalaring o‘zaro hamkorligi hal qiluvchi ahamiyatga ega. Davlat rahbari tashabbusi bilan Markaziy Osiyo davlatlari parlamentlarining muloqot maydoni tashkil etildi, bu esa bizning hamkorligimizda yangi sahifa ochilganidan yorqin dalolatdir, dedi senat raisi.

Narboyeva xonim parlamentlararo hamkorlikda ayollar roliga to‘xtalar ekan, Markaziy Osiyo yetakchi xotin-qizlarining doimiy faoliyat ko‘rsatadigan platformasi gender tengligi masalalarini ochiq va konstruktiv muhokama qilish uchun muhim mexanizmga aylanganini alohida ta’kidlab o‘tdi.

Mintaqamizda ayollar faolligini oshirish, ularning mintaqa rivojlanishida ishtirokini kengaytirish jarayonlari ushbu format bilan hamkorlikda tashkil qilinishi maqsadga muvofiq.

Mintaqaning dolzarb ijtimoiy-iqtisodiy masalalarni hal etishda yoshlar ishtirokini kengaytirish, ularning g‘oya va tashabbuslarini qo‘llab-quvvatlash va amalga oshirish bugungi davrning talabi,  dedi Tanzila Norboyeva.

Markaziy Osiyo davlatlarining ikkinchi parlamentlararo forumi yakunida Xiva deklaratsiyasini qabul qilinadi.