Марказий Осиёда энг кўп аҳоли истиқомат қиладиган давлат, тарихий Буюк Ипак йўлида муҳим маскан — Ўзбекистон Дубайнинг туризм ландшафтида тобора муҳим рол ўйнамоқда.
2023 йилда Дубай Ўзбекистондан 132 мингга яқин сайёҳни қабул қилди. Бу рақам ўтган йилга нисбатан 56 фоизга кўп бўлиб, бу мамлакат туризм бозорига қизиқиш ортиб бораётганидан далолат беради.
Дубай иқтисодиёт ва туризм департаменти (ДЕТ) ушбу суръатни мустаҳкамлаш ҳамда Ўзбекистондан ташриф буюрувчи сайёҳлар сонини янада ошириш бўйича янги стратегияларни кўриб чиқмоқда. ДЕТнинг Марказий Осиё бозорлари бўйича раҳбари Бадир Али Ҳабиб сўнгги интервьюсида Дубайнинг Ўзбекистон ва бошқа ривожланаётган бозорлар билан ҳамкорликни кучайтириш мақсадини билдирди.
Ривожланаётган давлатлар учун махсус ёндашув
Ҳабибнинг сўзларига кўра, Дубай ташриф буюрувчиларни жалб қилиш учун ўзига хос ёндашувни қўллаш ниятида.
“Жанубий Осиёда одамлар кўп йиллардан буён Дубайга саёҳат қилишлари ҳақида хабарингиз бор. Бироқ, биз учун Ўзбекистон ҳали ҳам улкан имкониятларга эга ҳамкор. Саъй-ҳаракатларимизни бошлаб юбордик. Мақсадимиз келгуси беш-ўн йил ичида Ўзбекистондан ташриф буюрувчилар сонини сезиларли даражада оширишдир”, деди Бадир Али Ҳабиб.
Бу стратегия Шайх Муҳаммад бин Рашид ал-Мактум томонидан Дубай иқтисодиётини икки баравар ривожлантириш, барқарор иқтисодий муҳитни таъминлаш, Дубайни яшаш ва ишлаш учун энг яхши глобал шаҳар сифатида ўрнатишга қаратилган D33 стратегиясига ўхшаш.
Меҳмонларни жалб қилувчи янги ташаббус ва кампаниялар
Ўзбекистонлик сайёҳларни жалб қилиш учун Дубай катталар учун меҳмонхона хизмати ва бундан ташқари болалар учун бепул аттракционлардан баҳраманд бўлиш имконини берувчи “Болаларга бепул” акцияси каби бир қанча лойиҳаларни ишга туширди.
“Ушбу кампания ёз ойларида айниқса самарали натижа кўрсатди”, деб таъкидлади Ҳабиб.
Бундан ташқари, Дубай Ўзбекистон билан ҳамкорлик алоқаларини мустаҳкамлашга ҳам алоҳида эътибор қаратмоқда. “Ўзбекистон ва Дубай ўртасида парвозлар сонини ошириш бўйича авиакомпаниялар билан мунтазам музокаралар олиб бормоқдамиз”, деди Ҳабиб.
Визасиз саёҳат
Январь ойида Ўзбекистон фуқаролари учун виза режимининг бекор қилиниши БАА туризм саноатини сезиларли даражада яхшилади.
“Жорий йилнинг январь—июнь ойлари орасида ўтган йилнинг шу даврига нисбатан сайёҳлар сонида 8 фоиз ўсиш кузатилди. Йилнинг қолган қисмида ҳам, айниқса Dubai Shopping Фестивали ва Dubai Fitness Challenge каби йирик тадбирлар орқали сайёҳлар сони янади ўсиши кутилмоқда”, деди Ҳабиб.
Ҳабибнинг таъкидлашича, келажакда Ўзбекистон бозори катта имкониятлар эшиги бўлиши мумкин. “Ўтган йилги 132 минг сайёҳ ташрифи фақат бошланиши. Бу суръатни мустаҳкамлаш ва ўсишда давом эттириш учун ҳаракатдамиз”, деди у.
Ўсиб бораётган туризм ландшафти
Дубайнинг Ўзбекистондан ташриф буюрувчиларни жалб қилиш борасидаги саъй-ҳаракатлари, янги диққатга сазовор жойлар, тадбирлар ва ташаббусларни ўз ичига олган кенг кўламли стратегиядан иборат. Тошкентдаги муҳим тадбирда ДЕТ 2023 йилда ўзбекистонлик сайёҳлар сони 56 фоизга ошганини эълон қилди.
Умуман олганда, Дубай 2023 йилда 17,15 миллион халқаро сайёҳни қабул қилди, 2024 йилда ҳам ўсиш тенденцияси давом этмоқда. Январдан июнгача ташриф буюрувчилар сони 9 фоизга ошган.
2023 йилнинг ёз ойларида ўзбекистонлик ташриф буюрувчилар сони ўтган йилга нисбатан 81 фоизга, 2019 йилнинг ёзига нисбатан эса 160 фоизга ошган.
Бу ўсишга Дубай, Тошкент ва Самарқанд ўртасидаги тўғридан тўғри рейслар ҳам ўз ҳиссасини қўшди. “Ўзбекистон ўсиб бораётган бозор ва биз ўзбек сайёҳлари сонининг сезиларли даражада ошганини кўришдан бениҳоя мамнунмиз. Тўғридан тўғри рейслар ва визасиз режимнинг жорий этилиши ҳам қўшимча қулайлик яратди. Мақсадимиз ҳар бир ўзбекистонлик сайёҳ унутилмас таассуротга эга бўлишини таъминлаш”, деди Ҳабиб.
Глобаллашув ва янги ишланмалар
Дубайнинг туризм соҳасидаги ютуқлари халқаро эътирофга сазовор бўлди, шаҳар 2024 йил бошида кетма-кет учинчи йил Тripadvisor Travelers’ Choice Awards танловида энг яхши сайёҳлик йўналишлари бўйича биринчи ўринни эгаллади. Шаҳар ҳали-ҳалигача ўзининг ҳордиқ чиқариш ва ўйин-кулги учун глобал марказ мақомини сақлаб қолмоқда. Ўтган йилнинг октябрь ойида Реал Мадрид билан имзоланган узоқ муддатли шартнома Дубай иқтисодий кун тартиби, D33 доирасида шаҳар мақсадларини қўллаб-қувватлашга қаратилган.
Дубай, шунингдек, “Яқин Шарқ ва Шимолий Африканинг 50 та энг яхши ресторани” каби нуфузли рейтингларида ўз ўрнига эга. Бундан ташқари 2022 йилдан бери Дубай “Мишлен қўлланмаси”нинг мезбони. Kids Go Free акциясида иштирок этувчи 100 дан ортиқ меҳмонхоналарни ўз ичига олган Dubai Summer Surprises ва Dubai Shopping Фестивали каби тадбирлар йил давомида халқаро меҳмонларни жалб қилишда давом этмоқда.
Барқарор стратегия
Бирлашган Араб Амирликларининг 2024-Барқарорлик йилига мувофиқ, Дубай туризм ва меҳмондўстлик соҳаларида турли дастур ва ташаббуслар орқали барқарор ўсишга интилмоқда. “Ҳаёт учун” кампанияси билан Dubai Cаn лойиҳаси икки йил ичида 500 мл ҳажмдаги пластик бутилкалар сонини 18 миллионга қисқартирди. Айни пайтда, Dubai Reef лойиҳаси дунёдаги энг катта денгиз рифини яратиш, балиқ захиралари ва денгиз био хилма-хиллигини оширишга қаратилган.
Инновацион стратегиялар, мақсадли кампаниялар ва барқарор стратегиялар билан Дубай Ўзбекистон билан ўсиб бораётган алоқаларни мустаҳкамлаш, туризмда узлуксиз ўсишни таъминлаш ва икки минтақа ўртасидаги динамик муносабатларни ривожлантиришга тайёр.
Тўлиқ видеони томоша қилинг:
Изоҳ (0)