O‘zbekistonning Buyuk Britaniyadagi elchisi Ravshan Usmanov Abercrombie & Kent sayyohlik kompaniyasi ijrochi direktori Maksimilian Maklay bilan muzokara o‘tkazdi. Bu haqda “Dunyo” AA xabar berdi.
Muloqot davomida Maksimilian Maklay britaniyalik va boshqa xorijiy sayyohlar orasida O‘zbekistonga qiziqish ortib borayotganini taʼkidladi.
“So‘nggi yillarda Abercrombie & Kent kompaniyasi O‘zbekistonga ko‘proq sayohat uyushtirmoqda. Biz mamlakatning boy madaniy merosi, ajoyib manzaralari va o‘zbek xalqining mehmondo‘stligini yuksak qadrlaymiz”, degan u.
Uchrashuvda O‘zbekiston va Abercrombie & Kent o‘rtasidagi hamkorlikni yanada rivojlantirish istiqbollari muhokama qilindi. Muzokaralar yakunida O‘zbekistonga Buyuk Britaniyadan 1500 dan ortiq sayyohni jalb etish bo‘yicha kelishuvga erishildi.
Aprel oyida Buyuk Britaniyaning Jules Verne kompaniyasi bilan hamkorlikda 2024-yil davomida 500 dan ortiq sayyohni O‘zbekistonga yuborish bo‘yicha kelishuvga erishilgandi.
Avgust oyida O‘zbekistonga Buyuk Britaniyadan keluvchilar soni oshgani, 2024-yilning 6 oyida turistik maqsadlarda ushbu mamlakatdan 9 ming nafar fuqaro kelgani haqida xabar berilgandi.
Izoh (0)