Prezident Shavkat Mirziyoyev 12-sentyabr kuni Turkiya tashqi ishlar vaziri Hakan Fidan, ichki ishlar vaziri Ali Yerlikaya va Milliy razvedka xizmati direktori Ibrohim Qalindan iborat delegatsiyani qabul qildi. Bu haqda Prezident matbuot xizmati xabar berdi.
Uchrashuv avvalida yuqori martabali mehmonlar davlat rahbariga Turkiya prezidenti Rajab Toyyib Erdo‘g‘onning samimiy salomi va eng ezgu tilaklarini yetkazdilar.
O‘zbekiston prezidentining 6-7-iyun kunlari Turkiyaga qilingan rasmiy tashrifi chog‘ida erishilgan kelishuvlarni amalga oshirish doirasida O‘zbekiston-Turkiya keng qamrovli strategik sheriklik munosabatlarini yanada mustahkamlash va ko‘p qirrali hamkorlikni rivojlantirishning dolzarb masalalari ko‘rib chiqildi.
Bugun ikki davlat vazirlari va idoralari rahbarlari o‘tkazgan qo‘shma uchrashuvning samarali natijalari yuqori baholandi. Qabul qilingan “yo‘l xaritasi”ga muvofiq muntazam va tizimli aloqalarni davom ettirish, bunday muzokaralar formati va kun tartibini kengaytirish muhimligi taʼkidlandi.
Siyosiy muloqotni chuqurlashtirish, savdo-iqtisodiy va investitsiyaviy hamkorlik loyihalarini ilgari surish masalalari muhokama etildi. Xavfsizlikka zamonaviy tahdid va xatarlarga qarshi kurashish bo‘yicha idoralararo hamkorlikni kuchaytirish va qo‘shma tadbirlar o‘tkazishga alohida eʼtibor qaratildi.
Shuningdek, mintaqaviy hamkorlik va xalqaro tashkilotlar doirasidagi sheriklikning dolzarb jihatlari yuzasidan fikr almashildi.
Izoh (0)