Buxoro viloyatining Romitan tumanida o‘qituvchilarni “Tashabbusli budjet” loyihasiga ovoz yig‘ishga majburlagan maktab direktori 34 mln so‘m jarimaga tortildi. Bu haqda Odam savdosiga qarshi kurashish va munosib mehnat masalalari bo‘yicha milliy komissiya xabar berdi.
![](/static/2024/09/10/7-AEnSxtik.jpg)
Maʼlum qinishicha, komissiya tashabbusi bilan ijtimoiy tarmoqlarda “Tashabbusli budjet” uchun ayrim soha vakillarining ovoz yig‘ish ishlariga jalb qilinganligi holatlari atroflicha o‘rganildi.
Davlat mehnat inspeksiyasi tomonidan olib borilgan o‘rganish natijalari bo‘yicha Buxoro viloyati Romitan tumani 18-sonli umumiy o‘rta taʼlim maktabi direktori tomonidan maktab o‘qituvchilarini lavozim yo‘riqnomasiga kirmaydigan “Tashabbusli budjet” loyihasiga ovoz yig‘ishga majburan jalb qilganligi aniqlandi.
Unga nisbatan BHM 100 baravari — 34 mln so‘m miqdorida maʼmuriy jarima qo‘llanildi.
“Milliy komissiya barcha masʼullarni, shuningdek, ish beruvchilarni, hudud rahbarlarini xodimlarning konstitutsiyaviy huquqlarini taʼminlashga chaqiradi”, deyiladi xabarda.
Izoh (0)