“Namangan suv taʼminoti” AJ tomonidan olib borilgan davlat xaridlarida “Raqobat to‘g‘risida”gi qonun talablari buzilgani aniqlandi. Bu haqda Raqobatni rivojlantirish va isteʼmolchilar huquqlarini himoya qilish qo‘mitasi xabar qildi.
Qo‘mitaning viloyat hududiy boshqarmasi “Namangan suv taʼminoti” tomonidan 2023—2024-yillarda amalga oshirilgan davlat xaridlari yuzasidan o‘rganish va tahlillar olib borgan.
Jumladan, Namangan viloyat prokuraturasining topshirig‘iga ko‘ra, “Namangan suv taʼminoti” buyurtmachiligida 2023-yil davomida hamda 2024-yil 16-iyun kuniga qadar jami 167 ta lot bo‘yicha boshlang‘ich narxi 4,9 milliard so‘mga yaqin amalga oshirilgan davlat xaridlari o‘tkazilgan.
O‘rganishlar davomida mazkur aksiyadorlik jamiyati tomonidan yuqoridagi davlat xaridlarini amalga oshirishda “Raqobat to‘g‘risida”gi qonun talablariga rioya etilmagani aniqlangan. Bundan tashqari, buyurtmachi tomonidan 36 ta lot bo‘yicha boshlang‘ich narxi 846,1 million so‘mlik tanlov savdolarida bir-biriga bog‘liq bo‘lgan (affillangan) jamiyatlar g‘olib deb topilgan.
Qayd etilishicha, hududiy boshqarma tomonidan davlat xaridlarida “Raqobat to‘g‘risida”gi qonun talablari buzilgani yuzasidan buyurtmachi tashkilot — “Namangan suv taʼminoti”ga nisbatan tuzilgan maʼlumotlar huquqni muhofaza qiluvchi organga taqdim etildi.
Shuningdek, “Namangan suv taʼminoti” mansabdorlariga nisbatan maʼmuriy jarima qo‘llash bo‘yicha maʼmuriy bayonnoma rasmiylashtirilib, tegishli sud organiga maʼlumotlar yuborildi.
Bundan avval Raqobat qo‘mitasi “Toshkent shahar suv ta’minoti”ga nisbatan ish qo‘zg‘atgandi. Sirdaryo tuman Obodonlashtirish boshqarmasi o‘tkazgan 954 million so‘mlik davlat xaridlarida qonun buzilishi holati aniqlangandi.
Korrupsiyaga qarshi kurashish agentligi bergan ma’lumotga ko‘ra, 2024-yilning iyun—iyul oylarida jami 11 milliard so‘mlik davlat xaridlarida qonun buzilishi holatlari aniqlangan.
Izoh (0)