Italiyaning Lampeduza oroli yaqinida qayiq ag‘darilib ketishi oqibatida 21 nafar muhojir bedarak yo‘qolgan. Bu haqda Il Messaggero gazetasi manbalarga tayanib xabar berdi.
Qayd etilishicha, 7 nafar suriyalik qirg‘oq qo‘riqlash xizmati xodimlari tomonidan qutqarilgan.
“1-sentyabr kuni Liviya qirg‘oqlaridan suzib kelgan qayiqda 28 kishi, jumladan, uch nafar bola ham bor edi. Ular bir kun ochiq dengizda suzib yurgandan keyin halokatga uchragan”, deyiladi guvohlarning ko‘rsatmalarida.
Qutqarilganlar vaqtinchalik qabul qilish markaziga olib ketildi, deya qayd etadi portal.
Italiya hukumati ko‘p sonli qurbonlar bo‘lgan bir qator yirik kema halokatlaridan keyin odamlarni noqonuniy tashishga qarshi kurash choralarini ko‘rishni boshladi. Rim, xususan, migrantlarning qariyb yarmi kelgan Tunis bilan tegishli shartnomalar tuzgan.
Bundan tashqari, Albaniyada migrantlarni qabul qilish uchun eksterritorial markaz ochilishi ko‘zda tutilgan, u yerda migrantlarning Yevropada boshpana olish masalasi ko‘rib chiqiladi.
Izoh (0)