Kongo Demokratik Respublikasida 12-iyun kuni yo‘lovchilar qayig‘i daryoga ag‘darilib ketishi oqibatida 80 nafardan ortiq fuqaro halok bo‘ldi. Bu haqda Al Jazeera xabar berdi.
Halokat May-Ndombe provinsiyasi hududidan oqib o‘tuvchi Kva daryosida ro‘y bergan. Qayiq ko‘p sonli yo‘lovchilarni ko‘tara olmay, daryoga ag‘darilib ketgan.
KDR prezidenti Feliks Tshisekedi holat yuzasidan tergov o‘tkazishga chaqirgan. Halokat haqida birinchi bo‘lib xabar bergan ham aynan prezident idorasi hisoblanadi.
Qayiq May-Ndombe provinsiyasidagi Mushie shahridan yo‘lga chiqqan. 70 kilometr suzgach, Kva daryosi ayrilish joyida ag‘darilgan.
“Respublika prezidenti ushbu baxtsiz hodisaning asl sabablarini o‘rganishga, kelajakda bunday halokat takrorlanishining oldini olishga chaqiradi”, deyiladi prezidentning X tarmog‘ida eʼlon qilingan postida.
May-Ndombe provinsiyasi gubernatori Rita Bola Dula xabar berishicha, halokatga qayiqning tunda suzgani sabab bo‘lgan. Qorong‘ilik oqibatida qayiq yo‘nalishni yo‘qotib qo‘ygan va girdob taʼsirida to‘ntarilib ketgan.
Izoh (0)