Италиянинг Лампедуза ороли яқинида қайиқ ағдарилиб кетиши оқибатида 21 нафар муҳожир бедарак йўқолган. Бу ҳақда IL Меssаggеrо газетаси манбаларга таяниб хабар берди.
Қайд этилишича, 7 нафар суриялик қирғоқ қўриқлаш хизмати ходимлари томонидан қутқарилган.
“1 сентябрь куни Ливия қирғоқларидан сузиб келган қайиқда 28 киши, жумладан, уч нафар бола ҳам бор эди. Улар бир кун очиқ денгизда сузиб юргандан кейин ҳалокатга учраган”, дейилади гувоҳларнинг кўрсатмаларида.
Қутқарилганлар вақтинчалик қабул қилиш марказига олиб кетилди, дея қайд этади портал.
Италия ҳукумати кўп сонли қурбонлар бўлган бир қатор йирик кема ҳалокатларидан кейин одамларни ноқонуний ташишга қарши кураш чораларини кўришни бошлади. Рим, хусусан, мигрантларнинг қарийб ярми келган Тунис билан тегишли шартномалар тузган.
Бундан ташқари, Альбанияда мигрантларни қабул қилиш учун экстерриториал марказ очилиши кўзда тутилган, у ерда мигрантларнинг Европада бошпана олиш масаласи кўриб чиқилади.
Изоҳ (0)