Kongo Demokratik Respublikasida qamoqxonadan qochishga uringan kamida 129 mahbus halok bo‘lgani taxmin qilinmoqda.
“Poytaxt Kinshasada joylashgan Makala qamoqxonasidagi 24 nafar mahbus ogohlantirilgandan so‘ng otib o‘ldirilgan, yana o‘nlab kishilar oyoq ostida qolib yoki bo‘g‘ilib o‘lgan”, deb yozdi ichki ishlar vaziri Jakmen Shabani X sahifasida.
Uning so‘zlariga ko‘ra, voqea 2-sentyabrga o‘tar kechasi qamoqxonada tartibsizlik boshlanganida sodir bo‘lgan. O‘limlardan tashqari, kamida 59 kishi jarohatlangan, shuningdek, qamoqdagi ayollarni zo‘rlash holatlari ham qayd etilgan.
G‘alayon chog‘ida mahbuslardan birortasi qochib ketolgani haqida ma’lumotlar mavjud emas. Mahalliy aholiga ko‘ra, xavfsizlik kuchlari jasadlarni qamoqxonadan mashinalarda olib chiqishdan oldin bir necha soat davomida otishma ovozlari eshitilgan.
IIV rahbari jazoni ijro etish muassasasiga katta miqdorda moddiy zarar yetkazilganini ma’lum qilgan – hodisa natijasida qamoqxonaning ma’muriy binolari, qamoqxona kasalxonasi va oziq-ovqat ombori butunlay yonib ketgan.
Makala qamoqxonasi Kongodagi eng katta qamoqxona hisoblanadi. U 1500 nafar mahbus uchun mo‘ljallangan, biroq rasmiy statistik maʼlumotlarga ko‘ra, unda bundan 10 baravar ko‘p – 14 000 dan 15 000 gacha mahbuslar mavjud.
Izoh (0)