Mavritaniya sohillarida muhojirlarni olib ketayotgan qayiq ag‘darilib ketishi oqibatida 15 kishi halok bo‘ldi, yana 195 kishi bedarak yo‘qoldi. Bu haqda CNN nashri xabar berdi.
Hodisa Mavritaniya poytaxti Nuakshot yaqinidagi dengiz hududida ro‘y bergan. Suv hududini kesib o‘tayotgan qayiq meʼyordan ortiq yo‘lovchi yuklashi va kuchli to‘lqinlar oqibatida ag‘darilib ketgan.
Xalqaro migratsiya tashkiloti va Mavritaniya qirg‘oq qo‘riqlash xizmati maxsus bayonot berib, halokat sodir bo‘lganini tasdiqlagan. Ag‘darilgan qayiqdan jami 120 kishi qutqarib olingani bildirilgan.
“Biz 15 nafar muhojirning halok bo‘lgani va Nuakshot yaqinida qayiq ag‘darilishi oqibatida 195 kishining dengizda g‘oyib bo‘lganidan chuqur qayg‘udamiz”, deyilgan Xalqaro migratsiya tashkilotining G‘arbiy va Markaziy Afrikadagi vakolatxonasi bayonotida.
Manbada aytilishicha, halokatga uchragan yo‘lovchilar yetti kun avval G‘arbiy Afrikadagi Gambiya davlatidan yo‘lga chiqishgan. Halok bo‘lganlarning millati va shaxsiga oid maʼlumotlar hali ham aniqlanmagan.
XMT tomonidan eʼlon qilingan bayonotda halokat “G‘arbiy Atlantika yo‘li” deb ataladigan noqonuniy migratsiya koridorida sodir bo‘lgani aytiladi. Unda aytilishicha, birgina 2024-yilning o‘zida Kanar orollariga 19 700 dan ortiq muhojir ushbu yo‘nalish bo‘yicha tartibsiz ravishda suzib kelgan. 2023-yilda esa bunday muhojirlar soni 7 590 nafar bo‘lgan.
2014 yildan beri Mavritaniya yo‘nalishidagi dengiz koridorida yuz bergan halokatlar oqibatida 4,500 dan ortiq noqonuniy muhojirlar o‘limi qayd etilgan. Faqat o‘tgan yilning o‘zida 1,950 kishi halok bo‘lgan.
Izoh (0)