Париж Олимпиадаси совриндорлари ва мураббийларига фахрий унвон ва орденларни топшириш маросими — суратларда

Шавкат Мирзиёев 28 август куни Кўксаройда XXXIII ёзги Олимпия ўйинлари ғолиб ва совриндорлари билан учрашди. Тадбирда Миллий Олимпия қўмитаси ва спорт федерациялари раҳбарлари, мураббийлар, спортчиларнинг ота-оналари, давлат ва жамоат ташкилотлари вакиллари ҳам қатнашди.

Ушбу Олимпия ўйинлари 26 июлдан 11 августгача Франция пойтахти Париж шаҳрида бўлиб ўтди. Унда 200 дан зиёд давлатдан 11 минг нафарга яқин энг кучли атлетлар қатнашди. Ўзбекистон 19 та спорт тури бўйича 90 нафар спортчи билан иштирок этди. Олимпия баҳсларида ўзбекистонлик спортчилар 8 та олтин, 2 та кумуш ва 3 та бронза медални қўлга киритди.

“Сизлар ғоят кескин беллашувларда юксак жасорат ва матонат кўрсатиб, 8 та олтин, 2 та кумуш, 3 та бронза медални қўлга киритганингиз мамлакатимизнинг тараққиёт борасидаги юксак салоҳиятини ифода этадиган ёрқин натижадир.

Бу тарихий ғалаба Янги Ўзбекистон ёшлари қандай буюк ишларга қодир эканини яна бир марта амалда намойиш этди. Мамлакатимиз иштирокчи давлатлар орасида умумжамоа ҳисобида 13-ўринни, Осиё қитъасида 4-ўринни, туркий ва ислом мамлакатлари ҳамда Мустақил Давлатлар Ҳамдўстлиги бўйича 1-ўринни эгаллади. Барчамизни қувонтирган бу натижалар Ўзбекистон тарихида илгари ҳеч қачон бўлмаган ютуқлардир” деди Шавкат Мирзиёев учрашувда сўзлаган нутқида.

Европанинг қоқ марказида спортчилар шарафига Ўзбекистон мадҳияси 8 карра янграб, мамлакат байроғи 13 марта баланд кўтарилди. Президент бу юксак натижалар халқимизга катта ғурур бағишлаганини таъкидлаб, спортчиларни олқишлади.

“Шу кунларда бутун халқимиз Мустақиллик байрамининг руҳи ва шукуҳи билан яшамоқда. Сизлар эришган ёрқин ғалабалар энг улуғ ва қадрли байрамимизга муносиб совға бўлди. Сизларнинг қаҳрамонлигингиз ёшларимизга, чекка жойлардаги спорцевар болаларга куч-қудрат берди. Бутун халқимизни ғурурлантирди, янада бирлаштирди. Шараф сизларга, раҳмат сизларга!” деди президент.

Давлат раҳбари спортчиларга, уларнинг устоз ва мураббийларига, спорт делегацияси аъзоларига миннатдорчилик билдирди. Шу кунларда Паралимпия ўйинларида қатнашаётган спортчиларга куч-ғайрат ва омад тилади.

Қайд этилишича, келгуси тўрт йилда спортчиларни тайёрлаш бўйича катта дастурлар қабул қилинади. Ҳар бир йўналишда спорт медицинаси, фармакологияси, диетологияси, психологияси ва муҳандислиги бўйича чет элдан малакали мутахассислар жалб этилади.

Бу борада “Олимпия шаҳарчаси”да мусобақалар ва ўқув-машғулотларни илғор хорижий тажрибалар асосида ўтказиш бўйича алоҳида тизим яратилади. Баҳодир Жалолов, Оксана Чусовитина мактаблари каби ихтисослашган спорт муассасалари ҳар бир ҳудудда, ҳар бир спорт йўналиши бўйича ташкил қилинади.

Зарур спорт инфратузилмасига эга бўлган 15 та Олимпия ва паралимпияга тайёрлаш маркази, 6 та Республика олий спорт маҳорати мактаби, 56 та ихтисослаштирилган спорт мактабига маҳаллий ва хорижий мураббийлар бириктирилади. Давлат раҳбари оммавий спортни ривожлантириш миллий олимпия ҳаракатининг ажралмас қисми бўлиши кераклигини таъкидлади. Ҳукуматга бу борада таклифлар ишлаб чиқиш вазифаси топширилди.

Президентнинг 23 августдаги фармонига мувофиқ, Парижда бўлиб ўтган XXXIII ёзги Олимпия ўйинларида юксак натижаларга эришган спортчи ва мураббийлардан бир гуруҳи фахрий унвон ва орденлар билан тақдирланган эди. Тадбирда уларга мукофотларни топшириш маросими бўлиб ўтди.

Қуйида Кўксаройда бўлиб ўтган тадбирдан лавҳалар тақдим этилди