“Tolibon” Afg‘oniston sobiq hukumati qulaganidan so‘ng qo‘shni davlatlar, jumladan, O‘zbekistonga olib o‘tilgan harbiy vertolyotlarni qaytarish bo‘yicha rasmiy choralar ko‘rilganini ma’lum qildi.
“Tolibon” Mudofaa vazirligining rejalashtirish va siyosat vaziri o‘rinbosari Muhammad Qosim Farsid vazirlikning yillik hisobotida aytishicha, Afg‘onistonga qo‘shni davlatlarga topshirilgan 60 ga yaqin vertolyot va harbiy samolyotlarni qaytarish bo‘yicha rasmiy chora ko‘rildi.
“Tolibon” rasmiysi aynan qanday choralar haqida gap ketayotganini oshkor qilmadi.
Farsid sobiq hukumat qulagandan keyin, Amerika bosimi tufayli vertolyotlar “Tolibon”ga topshirilmayotganini da’vo qildi.
Afg‘onistonning O‘zbekistondagi aviatexnikalari
2021-yil avgust oyida “Tolibon” Kobulni egallab, o‘sha paytdagi prezident Ashraf G‘ani mamlakatdan ketganida afg‘on harbiylari samolyot va vertolyotda O‘zbekistonga qochib o‘tgan. O‘zbekiston prezidentining Afg‘oniston bo‘yicha maxsus vakili Ismatilla Ergashev O‘zbekistonga sobiq afg‘on uchuvchilari tomonidan olib o‘tilgan samolyot va vertolyotlar “Tolibon” harakatiga qaytarilmasligini ta’kidlagan.
Ergashevning so‘zlariga ko‘ra, aviatexnikalarni AQSH hukumati sotib olib bergan va Afg‘oniston sobiq hukumatiga vaqtinchalik foydalanish uchun topshirgan. Sobiq hukumat bu uchoqlarga bir dollar ham sarflamagan.
Siyosatchi afg‘on samolyotlari O‘zbekistonga kirgan payt chegarada bo‘lib, voqeaning bevosita ishtirokchisiga aylanganini aytdi. Rasmiy jarayon O‘zbekiston sudi hukmiga binoan qaror qilinishi, lekin vositalarni olib ketish Amerika ixtiyorida ekanini ta’kidladi.
Statistik ma’lumotlarga ko‘ra, Afg‘oniston hukumati o‘zgarishi davrida Tojikiston va O‘zbekistonga avvalgi hukumatning 60 dan ortiq harbiy vertolyotlari olib o‘tilgan.
2023-yil boshida marshal Abdurashid Do‘stum ushbu aviatexnikalarni Afg‘oniston qarshilik frontiga topshirishga chaqirgandi.
Izoh (0)