20 август куни президент Шавкат Мирзиёев ва тадбиркорлар учрашувида мамлакатда микромолия банклари очишга рухсат берилиши айтилди. Бу ҳақда президент матбуот котиби Шерзод Асадов хабар берди.
Мулоқотда республикада устав капитали камида 50 миллиард сўм бўлган микромолия банкларини ташкил этишга рухсат берилиши маълум қилинган. Мазкур турдаги банклар кредит портфелининг камида 70 фоизи кичик ва ўрта бизнесни молиялаштиришга йўналтирилади.
Микромолия ташкилотлари томонидан тадбиркорларга хорижий валютада хизмат кўрсатиш ва лицензия асосида тўлов ташкилоти сифатида фаолият юритишга рухсат берилади.
“Микромолия бозори учун йўл очиб берилди. Масалан, ўтган етти ойда 91 та микромолия ташкилоти 6,6 триллион сўмлик молиявий хизматлар кўрсатди ва йил якунигача бу рақам 12 триллион сўмга етказилади. Микромолия хизматларини давлат томонидан қўллаб-қувватлаш давом эттирилади. Уларга жорий йилдаги 1,6 триллион сўмга қўшимча 1 триллион сўм ресурс ажратилади”, дейилади хабарда.
2023 йил 11 ноябрда қабул қилинган президент қарори билан микромолия банклари ташкил этилишига рухсат берилганди. Ҳужжатда 2024 йил 1 апрелгача соҳага оид қонунларга ўзгартириш ва қўшимчалар киритиш кераклиги ёзилган. Хусусан, микромолия банкларининг ташкилий–ҳуқуқий шаклини, улар амалга оширадиган молиявий операциялар турларини кўрсатиш лозимлиги белгиланган.
Шу билан бирга, қарорда микромолия банкларига аҳоли ва юридик шахслардан омонат (депозит) жалб қилиш ва уларга микромолиявий хизматларни кўрсатиш ҳуқуқини бериш назарда тутилган. Микромолия ташкилотларини микромолия банкларига ва микромолия банкларини тижорат банкларига ҳамда аксинча трансформация қилиш тартибини белгилаш зарурлиги кўрсатиб ўтилган.
Изоҳ (0)