“Ilgari tinimsiz ‘tekshir-tekshirlar’ sabab 60 foiz yangi tadbirkor faoliyati bir yildayoq to‘xtab qolardi” — Shavkat Mirziyoyev

Bugun, 20-avgust kuni Qoraqalpog‘istonning Nukus shahrida prezident Shavkat Mirziyoyevning tadbirkorlar bilan ochiq muloqoti bo‘lib o‘tmoqda. Bu haqda prezident matbuot kotibi Sherzod Asadov maʼlum qildi.

Xabarga ko‘ra, davlat rahbari muloqot avvalida uch yildan ortiq ishlayotgan korxonalar ulushi ko‘payib borayotganini aytgan.

“Ilgari kredit, bozor topish, infratuzilma bilan bog‘liq muammolar, tinimsiz ‘tekshir-tekshirlar’ sababli 60 foiz yangi tadbirkorlar faoliyati birinchi yilning o‘zidayoq to‘xtab qolardi. Hozir esa uch yildan ortiq ishlayotgan korxonalar ulushi 76 foizni tashkil etib, ilk bor 300 mingtaga yetdi. Yana 100 mingdan ziyod shunday yakka tartibdagi tadbirkorlar bor”, deyiladi manba xabarida.

Muloqotda tadbirkorlar ko‘targan 700 dan ortiq masala, tashabbus va yangi loyihalarni qo‘llab-quvvatlash uchun 8 trillion so‘m qo‘shimcha mablag‘ ajratilgani qayd etilgan. Sanoat, qishloq xo‘jaligi, xizmatlar rivoji, tadbirkorlik infratuzilmasi uchun yana 18 trillion so‘m yo‘naltirilgan.

Maʼlumot uchun, uchrashuvda respublikaning barcha hududlaridan 300 ga yaqin tadbirkor va investorlar to‘plangan. Shuningdek, xorijda biznesini yo‘lga qo‘ygan yana 40 dan ziyod o‘zbekistonlik ishtirok etmoqda. Hududiy studiyalardan 3 mingga yaqin biznes vakillari qatnashyapti.