Qashqadaryo viloyatining Qarshi shahrida yashovchi 80 yoshli ayol Gulchehra Jabborova sud va MIB o‘rtasida “koptok bo‘lmoqda”. Onaxonga Fuqarolik ishlari bo‘yicha Shahrisabz tumanlararo sudi tomonidan noqonuniy jarima yozilgan. MIB esa 80 yoshli onaxonga “MIBga tezda yetib keling, bo‘lmasa IIB xodimlari tomonidan majburiy tartibda olib kelamiz”, deya do‘q-po‘pisa qilmoqda. Bu haqda “Daryo”ga Gulchehra ayaning farzandi Bahodir Xushmanov xabar berdi.
Biz Qarshi shahrida yashaymiz. Kitob va Shahrisabz tomonlarda qarindoshimiz ham, biror bir mulkimiz ham yo‘q. Shunga qaramasdan kuni kecha uyimizga MIBdan do‘q-po‘pisalarga boy xat keldi. Unda 80 yoshli onamni MIBga 16-avgust kuni tezda yetib kelishi kerakligi, agar aytilgan vaqtda yetib bormasa IIB xodimlari orqali majburiy tartibda olib ketilishi va 3 million 700 ming so‘m jarima undirilishi bildirilgan.
Gap nimada deb, xatni o‘qisak onamning Shahrisabzda ko‘p qavatli uylardan xonadoni borligi, o‘sha ko‘p qavatli uylarni nazorat qiluvchi shirkatdan 1 million 242 ming so‘m qarzdor ekani bildirilgan. Eng qizig‘i biz bexabar bu ish sudda ham ko‘rib chiqilgan. 2024-yilning 10-may kuni bo‘lib o‘tgan sudda fuqarolik ishlari bo‘yicha Shahrisabz tumanlararo sudi sudyasi B.Islomov onam mulkdorlardan undiriladigan majburiy to‘lov va badallari hisobidan qarzdor bo‘lib qolganini, undan shu pul va qo‘shimchasiga pochta to‘lovlari uchun 17 ming so‘m undirish kerakli haqida qaror chiqargan. Ko‘p o‘tmay ish MIBga o‘tgan va yuqorida aytganimdek MIBdan do‘q-po‘pisalarga to‘la xat kelib turibdi, deydi Bahodir Xushmanov.
Suhbatdoshga ko‘ra, u kecha — 2024-yilning 15-avgust kuni vaziyatga aniqlik kiritish maqsadida MIBning Qarshi shahar bo‘limiga yetib borgan. Borsa, MIB xodimi xatolikka yo‘l qo‘yilganini, anglashilmovchilik sabab Gulchehra Jabborova nomida uy borligi aytilib, bu ish sudda ko‘rib chiqilganini tan olgan. Qo‘shimchasiga MIB foydasiga chiqarilgan ijro varaqasi uchun Gulchehra ayadan baribir 357 ming so‘m miqdoridagi to‘lov undirilishini aytgan.
-DP-V-4Fx.jpg)
Nega endi men va 80 yoshga kirgan onam shirkat xodimlari-yu, sudyalarning xatosi uchun tovon to‘lashimiz lozim. Nega sarson bo‘lishimiz kerak?, deydi u.
“Daryo” jurnalistining bu haqdagi savoliga javob bergan MIBning viloyat boshqarmasi mas’uli Gulnoza Dilmurodova sud xato qilgan bo‘lsa-da, fuqarodan ijro hujjati bo‘yicha pul undirilishi majburiy ekanini, jarimani to‘lagan fuqaro sudga borib bu xato bo‘lgani haqida alohida ajrim chiqarib kelsagina davlatga to‘lagan puli qaytarib berilishini ma’lum qildi.
Demak, men shirkat va sudyalarning e’tiborsizligi sabab kelib chiqqan xato uchun 80 yoshli onamni olib, sarson bo‘lishim kerak. Ishimga o‘z vaqtida borolmay, ovora bo‘lamanmi? Ham jarima to‘lab, iqtisodiy zarar ko‘rishim kerakmi? Qani bu yerda mantiq? Nega sud ishlari bunchalik mas’uliyatsizlik bilan ko‘riladi?, deydi bu haqda shikoyat qilgan Bahodir aka.
Izoh (0)