Surxondaryo viloyati Sariosiyo tumanida ayol tanishiga bergan qarzini MIB orqali qaytarib oldi. Bu haqda MIB axborot xizmati “Daryo”ga xabar berdi.
Ma’lum qilinishicha, Sariosiyo tumanida yashovchi tadbirkor ayol o‘zining yaqin tanishi bo‘lgan S.A.ning iltimosini rad etmay, qisqa fursatda qaytarish sharti bilan 100 million so‘mga yaqin qarz bergan. Va’da qilingan kun o‘tgan bo‘lsa-da, qarzni bermaslik uchun turli bahonalarni ro‘kach qilib, qarzni qaytarmay kelgan.
Ayol ikki yil o‘tib, fuqarolik ishlari bo‘yicha Sariosiyo tuman sudiga murojaat qildi. Sud uning haqiqatdan uning tanishiga 97 million 560 ming so‘m qarz berganini, ushbu qarzlar yillar davomida qaytarilmagani sababli majburiy tartibda undirishni belgilab berdi.
Mazkur sudning qarz undirish to‘g‘risidagi ijro hujjati byuroning Sariosiyo tuman bo‘limi ish yurituviga qabul qilinib, ijro harakatlariga kirishildi. Qarzdor fuqaro S.A. bir necha bor ogohlantirilgan bo‘lsa-da, qarzdorlikni belgilangan ixtiyoriy muddatda qaytarmagan.
Shundan so‘ng, majburiy ijro harakatlariga kirishilib, qarzdor fuqaroga tegishli bo‘lgan ko‘chmas mulki xatlovga olindi va realizatsiya qilish maqsadida auksion savdolariga chiqarilgan vaqtda belgilangan qarzdorlik hamda oldindan to‘langan davlat boji jami 101 million 480 ming so‘m naqd undirib berilishi ta’minlandi.
Ijro hujjati amalda tamomlanib, qarzdorga nisbatan qo‘llangan barcha cheklov choralari bekor qilindi.
Izoh (0)