Samarqand viloyat sudi Iqtisodiy ishlar bo‘yicha sudlov hay’atining taftish instansiyasi MIBning Nishon tuman bo‘limi traktorini noqonuniy olib qo‘yib, 49 kun davomida jarima maydonida saqlashi oqibatida fermerga 355 million so‘m zarar yetkazgani bilan bog‘liq holatni ko‘rib chiqayotgani xabar berilgandi. Sudning bugun, 29-iyul kuni davom etgan navbatdagi majlisida ochiq qolgan savollarga javob berildi.
Da’vogar manfaatini himoya qilayotgan Qashqadaryo viloyat Fermer-dehqon xo‘jaliklari va tomorqa yer egalari Kengashining huquqiy masalalar hamda fermer dehqon xo‘jaliklari va tomorqa yer egalari huquqlarini himoya qilish bo‘yicha bosh mutaxassisi To‘lqin Shoimov sudlov hay’ati O‘zbekiston Respublikasining Iqtisodiy protsessual kodeksi va Oliy sud plenumi qarorlariga zid ravishda da’vo predmetidan chetga chiqayotganini aytmoqda.
2024-yil 22-iyul kuni bo‘lib o‘tgan sudda ham, bugun 29-iyul kuni davom etgan navbatdagi majlisda ham taftish instansiyasi da’vo predmeti — MIB Nishon tumani bo‘limi tomonidan to‘lanishi lozim bo‘lgan jami 355 million 740 ming so‘m zarar bo‘lsa-da, undan chetga chiqib, “Samandar nur” fermer xo‘jaligining shtatlar birligida buyruq asosida mexanizator shtati mavjud yoki mavjud emasligi bilan qiziqmoqda. Fermer xo‘jaligida mexanizator buyrug‘i mavjud bo‘lsa, unga qancha miqdorda oylik ish haqi to‘lagansiz, bu haqida hujjatlar taqdim eting deya ishni qoldirishgandi. Bugungi sudda ham aynan shu holat kuzatildi, — deydi To‘lqin Shoimov.
“Samandar nur” fermer xo‘jaligi rahbari Ashurali Boltayev ham uning so‘zini ma’qullab, da’vogar sifatida 49 kun ichida boy berilgan zararni qoplashni talab qilishayotganini ta’kidlamoqda.
Sudda ishtirok etayotgan biznes-ombudsman devonining Qashqadaryo viloyatidagi vakili Ismoil Sayitov MIB ijrochilarining xatti-harakatida qonunga zidlik borligini aytib, ular shuningdek, mansab vakolatlarini ham suiste’mol qilganini ta’kidladi. Hamda suddan jinoiy ish qo‘zg‘atish to‘g‘risida prokuraturaga xususiy ajrim chiqarishni so‘radi.
Davlat ijrochisining xatti-harakati g‘ayriqonuniyligi ma’muriy sud qarori bilan isbotlangan. Bu iqtisodiy sud uchun majburiy bo‘ladi. Birinchi instansiya sudi adolatli qaror qabul qilgandi. Apellatsiya instansiya sudi birinchi instansiya sudi qaror qabul qilishdan oldin inobatga olgan o‘ndan ortiq vajlarni inobatga olmasdan, ularni inkor etmasdan yo‘q joydan yuzaki vajlar bilan birinchi instatsiya sudi qarorini bekor qilib yuboryapti. Shu uchun Samarqand viloyat sudi Iqtisodiy ishlar bo‘yicha sudlov hay’atining taftish instansiyasidan apellatsiya intansiyasi qarorini bekor qilib, davlat ijrochilarining xatti-harakatlarida mansab vakolatini suiste’mol qilish alomati bo‘lgani uchun jinoiy ish qo‘zg‘atish to‘g‘risida prokuraturaga xususiy ajrim chiqarishini so‘raymiz, — deydi sudda ishtirok etgan biznes-ombudsman devonining Qashqadaryo viloyatidagi vakili Ismoil Sayitov.
Sud 2024-yilning 1-avgust kuni soat 14:30 gacha tanaffus e’lon qildi.
Izoh (0)