Қашқадарё вилоятининг Қарши шаҳрида яшовчи 80 ёшли аёл Гулчеҳра Жабборова суд ва МИБ ўртасида “копток бўлмоқда”. Онахонга Фуқаролик ишлари бўйича Шаҳрисабз туманлараро суди томонидан ноқонуний жарима ёзилган. МИБ эса 80 ёшли онахонга “МИБга тезда етиб келинг, бўлмаса ИИБ ходимлари томонидан мажбурий тартибда олиб келамиз”, дея дўқ-пўписа қилмоқда. Бу ҳақда “Дарё”га Гулчеҳра аянинг фарзанди Баҳодир Хушманов хабар берди.
Биз Қарши шаҳрида яшаймиз. Китоб ва Шаҳрисабз томонларда қариндошимиз ҳам, бирор бир мулкимиз ҳам йўқ. Шунга қарамасдан куни кеча уйимизга МИБдан дўқ-пўписаларга бой хат келди. Унда 80 ёшли онамни МИБга 16 август куни тезда етиб келиши кераклиги, агар айтилган вақтда етиб бормаса ИИБ ходимлари орқали мажбурий тартибда олиб кетилиши ва 3 миллион 700 минг сўм жарима ундирилиши билдирилган.
Гап нимада деб, хатни ўқисак онамнинг Шаҳрисабзда кўп қаватли уйлардан хонадони борлиги, ўша кўп қаватли уйларни назорат қилувчи ширкатдан 1 миллион 242 минг сўм қарздор экани билдирилган. Энг қизиғи биз бехабар бу иш судда ҳам кўриб чиқилган. 2024 йилнинг 10 май куни бўлиб ўтган судда фуқаролик ишлари бўйича Шаҳрисабз туманлараро суди судьяси Б.Исломов онам мулкдорлардан ундириладиган мажбурий тўлов ва бадаллари ҳисобидан қарздор бўлиб қолганини, ундан шу пул ва қўшимчасига почта тўловлари учун 17 минг сўм ундириш керакли ҳақида қарор чиқарган. Кўп ўтмай иш МИБга ўтган ва юқорида айтганимдек МИБдан дўқ-пўписаларга тўла хат келиб турибди, дейди Баҳодир Хушманов.
Суҳбатдошга кўра, у кеча — 2024 йилнинг 15 август куни вазиятга аниқлик киритиш мақсадида МИБнинг Қарши шаҳар бўлимига етиб борган. Борса, МИБ ходими хатоликка йўл қўйилганини, англашилмовчилик сабаб Гулчеҳра Жабборова номида уй борлиги айтилиб, бу иш судда кўриб чиқилганини тан олган. Қўшимчасига МИБ фойдасига чиқарилган ижро варақаси учун Гулчеҳра аядан барибир 357 минг сўм миқдоридаги тўлов ундирилишини айтган.
-DP-V-4Fx.jpg)
Нега энди мен ва 80 ёшга кирган онам ширкат ходимлари-ю, судьяларнинг хатоси учун товон тўлашимиз лозим. Нега сарсон бўлишимиз керак?, дейди у.
“Дарё” журналистининг бу ҳақдаги саволига жавоб берган МИБнинг вилоят бошқармаси масъули Гулноза Дилмуродова суд хато қилган бўлса-да, фуқародан ижро ҳужжати бўйича пул ундирилиши мажбурий эканини, жаримани тўлаган фуқаро судга бориб бу хато бўлгани ҳақида алоҳида ажрим чиқариб келсагина давлатга тўлаган пули қайтариб берилишини маълум қилди.
Демак, мен ширкат ва судьяларнинг эътиборсизлиги сабаб келиб чиққан хато учун 80 ёшли онамни олиб, сарсон бўлишим керак. Ишимга ўз вақтида боролмай, овора бўламанми? Ҳам жарима тўлаб, иқтисодий зарар кўришим керакми? Қани бу ерда мантиқ? Нега суд ишлари бунчалик масъулиятсизлик билан кўрилади?, дейди бу ҳақда шикоят қилган Баҳодир ака.
Изоҳ (0)