Hech kim mol-mulkini boqiy dunyoga o‘zi bilan olib keta olmaydi, ammo shunday insonlar borki, vafotidan keyin ham ularing daromadi oshishda davom etmoqda. Quyida oila a’zolari va avlodlarini uzoq muddatga moliyaviy ta’minlay olishga muvaffaq bo‘lgan marhum yulduzlarni yodga olamiz.
Maykl Jekson
Afsonaviy xonanda Maykl Jekson pop madaniyatida yorqin iz qoldirdi. Yulduz 2009-yil 25-iyun kuni 50 yoshida hayotdan ko‘z yumdi, ammo u o‘zining millionlab dollarlik daromadi bilan ko‘plab tirik hamkasblaridan boyroqdir. Hatto “Neverlandni tark etib” shov-shuvli hujjatli filmi sababli 2005-yilda Maykl Jeksonni bolalarga nisbatan zo‘ravonlikda ayblashgan va u advokatlar, tovon puli uchun millionlarni sarflagan bo‘lsa ham, yulduzning daromadlariga putur yetmagan.
Merilin Monro
Mashhur aktrisaning o‘limi hali ham sirligicha qolmoqda. Aktrisaning jasadi 1962-yili 4-avgustdan 5-avgustga o‘tar kechasi Los Anjelesdagi uyidan topilgan. Merilin Monro haqiqatan ham o‘zini zaharlab joniga qasd qilganmi yoki u aslida Amerika razvedka xizmati tomonidan o‘ldirilganmi, hali ham nomaʼlumligicha qolmoqda. Ammo 64 yildan keyin ham Monro dunyodagi eng “qimmat” yulduzlardan biri bo‘lib qolmoqda. Uning ismi va suratidan yuzlab turli brendlar foydalanadi, bu esa Merilinning merosxo‘rlariga katta daromad keltiradi.
Freddi Merkyuri
Noyabr oyining oxirida xonanda Freddi Merkyuri OITSdan vafot etganiga 33 yil to‘ladi, lekin u hali ham millionlab dollar ishlab topadi. Bunga 2018-yilda suratga olingan “Bogemiya Rapsodiyasi” filmi katta yordam berdi. Film kassada deyarli bir milliard dollar ishlab topdi, ularning bir qismi yulduzning merosxo‘rlariga o‘tdi. Shu bilan birga, mazkur film Queen guruhining qo‘shiqlariga o‘zgacha mashhurlik olib keldi. Bu esa gonorar va turli esdalik sovg‘alar savdosini oshirishga xizmat qildi.
Jon Lennon
Afsonaviy The Вeatles guruhi a’zolaridan biri Jon Lennon qariyb 44 yil avval vafot etgan, ammo u hali ham eng ko‘p maosh oluvchi ijrochilar reytingini tark etmayapti. Britaniyalik musiqachi bugungi kunda ham mashhur bo‘lib, uning qo‘shiqlari merosxo‘rlariga juda katta daromad keltirishdan to‘xtamayapti.
Elvis Presli
Rok-n-roll qirolining o‘limi hanuzgacha qizg‘in munozaralarga sabab bo‘lmoqda va uning ko‘plab muxlislari buni qo‘shiqchi tomonidan sahnalashtirilgan deb hisoblashadi. Forbes ma’lumotlariga ko‘ra, Elvis har yili 30 million dollarga yaqin pul topadi. Xit qo‘shiqlaridan tashqari, Preslining mashhurlar uy-muzeyiga aylantirilgan Graceland nomli saroyi merosxo‘rlarga mo‘may daromad — yiliga 10 million dollar olib keladi.
Bob Marli
Mashhur reggi qo‘shiqlari muallifi 1981-yilda saraton kasalligidan vafot etdi, ammo butun dunyodagi ko‘plab muxlislar uchun ezgulik timsoli bo‘lib qoldi. Marli atigi 36 yil yashadi va shu vaqt ichida u 11 nafar farzandning otasi bo‘ldi va yana ikkita bolani asrab oldi. Xonandaning barcha merosxo‘rlari otasi tomonidan to‘liq ta’minlangan, chunki ular hali ham Marlining nafaqat qo‘shiqlaridan, balki uning brendi ostida chiqarilgan kolonkalar, quloqchinlar, futbolka kabi turli tovarlar sotuvidan ham daromad olishadi.
Arnold Palmer
Vafotidan keyin ham oilasini ta’minlab keladigan insonlar orasida shou-biznes yulduzi bo‘lmagan sportchi — 2016-yilda yurak xurujidan vafot etgan mashhur golfchi Arnold Palmer ham bor. Uning nomi ostida yiliga bir necha million dollar daromad keltiradigan ichimlik ishlab chiqaruvchi brend mavjud. Shuningdek, uning oilasi MasterCard va futbolkalar ishlab chiqaradigan fabrikalar bilan shartnoma tuzgan. Ularda Palmerning logotipi tushirilgani hisobiga merosxo‘rlar har yili katta daromad ko‘radi.
Kobi Brayant
Mashhur amerikalik basketbolchi 2020-yilda qiz farzandi bilan vertolyot qulashi oqibatida vafot etgan. Brayantning yana uchta qizi va rafiqasi hamon uning reklama bitimlari orqali daromad olishadi.
Izoh (0)