Marvel studiyasi filmlarining reytingi vaqt o‘tgani sari o‘zgarib boradi. Buni Business Insider jurnalistlari tasdiqladi. Ular Rotten Tomatoes tanqidiy resursida Marvel olamining eng ommabop loyihalarini tahlil qildi va yangi reytingni tuzdi.
Mazkur reytingga so‘nggi 38 yil ichida suratga olingan 83 ta film kiritildi. Ularning aksariyati ulkan kassa tushumlariga ega bo‘lishiga qaramay, kino tanqidchilarining barchasiga birdek manzur bo‘lmadi.
Business Insider nashri 2015-yilda ekranlarga qaytgan “Fantastik to‘rtlik” filmining ikkinchi qismini Marvel studiyasi tarixidagi eng yomon film deb atadi. Remeyk atigi 9 foiz ijobiy baholarni oldi. O‘rgimchak odamning spin-offi bo‘lgan “O‘rgimchak xonim” filmi hamda “Elektra” reytingning quyi pog‘onasidan joy oldi. Tanqidchilar ularni 11 foiz ijobiy baholadi.
80-o‘rin Marvelning birinchi loyihasi “Govard ismli o‘rdak” filmiga nasib etdi. Loyiha 13 foiz ovoz oldi. Jared Leto ishtirokidagi “Morbius” esa atigi 15 foiz to‘pladi.
Reytingda yuqori pog‘onalarni egallagan loyihalarga kelsak, Maylz Morales haqidagi ikkita animatsion loyiha birinchilikni qo‘lga kiritdi: “O‘rgimchak odam: olamlar to‘ri” filmi 95 foiz baho bilan kuchli uchtalikka kirdi.
“O‘rgimchak odam: olamlar bo‘ylab” filmi 97 foiz to‘plab, reytingda birinchi o‘rinni egalladi. Eng yaxshi filmlar ro‘yxatiga “Qora panterra” ham kiritildi. Tanqidchilar tomonidan loyiha 96 foiz baholandi. Keyingi ikki o‘rinni “Qasoskorlar: Final” va “Temir odam” filmlari egalladi.
Izoh (0)