Har qanday ayol yuz terisi tiniq va muammolarsiz bo‘lishini istaydi. Terining yaxshi ko‘rinishi va uni jiddiy muammolardan himoya qilish uchun kosmetik vositalarni to‘g‘ri tanlash va ulardan foydalanishda xatolarga yo‘l qo‘ymaslik kerak. Bugun quyoshdan himoyalovchi kremlarni qo‘llashda eng keng tarqalgan xatoliklar haqida ma’lumot beramiz.
1-xato: SPF quyosh nuri ostida qancha vaqt turishingiz mumkinligini ko‘rsatadi deb o‘ylash
Bu gap qisman to‘g‘ri, masalan, SPF surtilgan teri quyosh nurlari ostida 150 daqiqa ichida kuysa, himoyalanmagan teri qatlami 10 daqiqada kuyib qoladi. Bunda 150÷10=15 SPF formulasi kelib chiqadi.
Ammo dermatolog va onkologik kasalliklar markazi jarrohi Entoni Rossi ta’kidlashicha, laboratoriyadagi nurlar va ochiq havodagi quyosh nurlari bir-biridan farq qiladi. Ultrabinafsha nurlarning kuchi doimiy o‘zgarib turadi, shu sababli SPFni har ikki soatda yoki har yuvingandan so‘ng yangilash tavsiya etiladi.
2-xato: Har tomonlama himoyalovchi universal krem ishlatmaslik
Ozon qatlami orqali teriga zarar yetkazuvchi ikki turdagi nurlanish bizga yetib keladi: bu UVA va UVB nurlaridir. UVB nurlari terini kuydiradi, saratonni keltirib chiqaradi. UVA nurlari esa terini quritadi, pigment dog’lar hosil qiladi va elastiklikni yo‘qotish bilan birga keladigan qarishni keltirib chiqaradi. Ikkala nur ham epidermis uchun zararlidir. Shu sababli quyoshdan himoya qiluvchi keng spektrli vositalardan foydalanish lozim.
3-xato: Boshqa kosmetika tarkibidagi SPFga ishonish
Ko‘plab namlantiruvchi yoki tonal kremlar, pudralar tarkibida SPF himoya borligi yozilgan bo‘ladi, ammo ular juda past darajada himoyalovchi tarkibga ega. Shuning uchun doim avval quyoshdan himoya qiluvchi kremni surtish, yarim soatdan so‘ng boshqa kosmetik mahsulotlardan foydalanish kerak.
4-xato: Kremni to‘g‘ri tanlamaslik va yetarli miqdorda surtmaslik
Sprey ko‘rinishidagi SPF himoyasi yuzga bir tekis qatlamda tarqalmaydi, stik ko‘rinishidagi kremlar esa gigiyenik jihatdan noqulay hisoblanadi. Shu sababli faqat krem ko‘rinishidagi quyoshdan himoyalash vositasini tanlash va terining kvadrat santimetriga ikki milligramm miqdorda surtish kerak. Butun tanaga esa taxminan ikki osh qoshiq miqdorda vosita sarflanadi.
Foto: DSM
5-xato: Ko‘zlarni himoya qilmaslik
Qora ko‘zoynaklar shunchaki chiroyli aksessuar emas, balki haqiqatan ham muhim himoya vositasidir. Ko‘zoynak nafaqat ko‘z atrofidagi terini, balki ko‘z shoh pardasini ham zararli nurlardan himoya qiladi. Ultrabinafsha nurlanish ta’sirida katarakta rivojlanishi mumkin.
6-xato: Tashqariga chiqqandan so‘ng SPFdan foydalanish
Quyoshdan himoyalovchi kremdan doimo uydan chiqishdan taxminan yarim soat avval foydalanish zarur, chunki har qanday terini parvarish qilish mahsulotlari kabi, SPF kremi terida bir tekis himoya qobig‘i hosil qilishi uchun vaqt kerak.
7-xato: Sochlar ostidagi teriga e’tibor bermaslik
Quloqlar, ko‘z qovoqlari, bo‘yin orqasi, lablar va oyoqlar kabi tana qismlarini himoyalashni ko‘pincha yoddan chiqaramiz. Sochlar bosh terisini yetarli darajada quyoshdan asray olmaydi. Shu sababli oftob nuri to‘g‘ridan-to‘g‘ri tushadigan joylarda bosh kiyimini kiyish muhimdir.
Izoh (0)