Shunday turdagi kosmetika vositalari borki, ularni yozning jaziramasida va quyosh nurlari to‘g‘ridan to‘g‘ri tushadigan joylarga chiqqanda ishlatish zararga xizmat qiladi. Bugungi maqolada yoz mavsumida qanday turdagi kosmetikani faqat tunda ishlatish yoki salqin kunlar kelgunga qadar foydalanmaslik kerakligi haqida so‘zlashamiz.
Sitrus efir moylari
Sitrus iforli efir moylari tetiklik beradi, kayfiyatni ko‘taradi, ammo yoz faslida ulardan kun bo‘yi foydalanishdan ehtiyot bo‘ling. Sitrus mevalari terini patogenlardan himoya qiladigan komponentlarni o‘z ichiga oladi, ammo ularni teriga surtgandan so‘ng yozda ko‘chaga chiqsangiz, mazkur foydali elementlar fototoksik reaksiyani keltirib chiqaradi. Natijada teringizda qizarish, pigmentatsiya va hatto kuyish kabi holatlar kuzatilishi mumkin. Dermatolog va kosmetologlar sitrus mevali efir moylarini quyoshga chiqishdan kamida bir sutka oldin, eng yaxshisi kechasi, namlantiruvchi tungi niqoblar sifatida foydalanishni maslahat berishadi.
Antibakterial vositalar va tozalovchi kislotalar
Umuman olganda, yoz fasli piling va skatka kabi chuqur tozalash vositalari uchun maqul bo‘lmagan fasl. Bu mavsumda teringiz uchun qila oladigan eng yaxshi narsa bu unga kamida bir oy piling va niqoblardan dam berish, terining tabiiy pH balansini tiklash, yetarli miqdorda D vitamini olishdir. Yozgi mavsumda kundalik terini parvarish qilishda antibakterial va kislotali kosmetikalar, jumladan, salitsil va glikolik kislotalarni cheklashning yana bir sababi bor — ular yuzni husnbuzarlardan tozalash bilan birga terini quritib yuboradi. Ular terining ultrabinafsha nurlanishidan tabiiy himoya qiluvchi qatlamini buzadi va zararli quyosh nurlariga ta’sirchan bo‘lib qoladi.
Quyoshdan himoya qiluvchi spreylar va SPF 30 dan past kremlar
Go‘zallik mutaxassislari quyoshdan himoya qiluvchi spreylarni butun tana uchun, krem tuzilishidagi SPF’larni esa yuz va bo‘yin sohasi uchun qo‘llashni tavsiya beradi. Quyoshdan himoya qiluvchi bunday vositalar kamida 30 daraja SPF bo‘lishi lozim. SPF 30+ va undan yuqori bo‘lgan kremlar 95 foiz teri himoyasini ta’minlaydi. SPF qanchalik yuqori bo‘lsa, shuncha yaxshi.
Quyoshdan himoyalovchi krem tarkibiga e’tibor bersangiz, sink oksidi uning eng ishonchli va xavfsiz tarkibiy qismi bo‘lib, kosmetik mahsulotni sotib olishdan oldin uning mavjudligiga ishonch hosil qilishingiz kerak.
Retinol va retinoidli mahsulotlar
Tarkibida A vitamini va uning hosilalari bo‘lgan kundalik parvarish vositalari ham yoz uchun to‘g‘ri tanlov emas. Ular husnbuzar va ajinlar bilan kurashishda yaxshi yordam beradi, lekin quyosh nurlari bilan o‘zaro ta’sirlashish natijasida zararli mahsulotga aylanadi. Shuning uchun dermatologlar bunday vositalarni faqat tunda ishlatishni tavsiya qiladi. Ushbu ogohlantirish retinolning terini quritishi bilan ham bog‘liq. U terining tabiiy himoya qatlamini buzadi va to‘qimalarning ultrabinafsha nurlanishiga chidamliligini pasaytiradi.
Izoh (0)