Teridagi pigment dog‘lari — bu juda keng tarqalgan hodisa, ammo ularning namoyon bo‘lishi har xil: ayrim sepkillar diqqatni o‘ziga jalb qilishi mumkin, ammo yuz terisidagi turli o‘lchamdagi jigarrang dog‘lar keraksiz tashvishlanish va komplekslarni keltirib chiqarishi mumkin. “Noviy ochag” nashri pigment dog‘lari qanday paydo bo‘lishini va ularni yo‘q qilish uchun nima qilish kerakligi borasida to‘xtaldi.
Yozda kuchayadigan giperpigmentatsiya — teridagi ayrim joylarning rangi o‘zgarishi bo‘lib, bu pigment ishlab chiqaradigan melanotsit hujayralaridan kelib chiqadi. Teri pigmenti melanin epidermisning ma’lum bir qismida to‘planganda, dog‘lar terining asosiy rangidan ko‘ra to‘qroq ko‘rinadi. Quyosh melanin ishlab chiqarishni faollashtiradi. Quyosh ta’siridagi pigmentatsiya ko‘pincha yuz, bo‘yin, yelka va qo‘l terisida paydo bo‘ladi. Pigment dog‘lari og‘riqsiz bo‘lib, ular terining sirtidan ko‘tarilmaydi, terining tuzilishini o‘zgartirmaydi.
Giperpigmentatsiyani keltirib chiqaradigan omillar
Quyosh hamma uchun nur sochadi, lekin dugonangizda pigment dog‘lari bor-u, sizda yo‘q. Nima uchun bunday?
Teri pigmentatsiyasining hosil bo‘lishi uchun jiddiy qo‘zg‘atuvchi omillar:
- gormonal muvozanat (homiladorlik, menopauza);
- gormonal buzilishlar;
- ekologiyaning yomonligi;
- organizmdagi metabolik jarayonlarning buzilishi;
- oshqozon-ichak traktining ba’zi kasalliklari;
- reproduktiv tizimning, reproduktiv organlarning o‘tkir va surunkali yallig‘lanishi (masalan, endometrioz);
- irsiy omil (giperpigmentatsiyaning turlaridan biri — sepkillar avloddan avlodga o‘tishi mumkin);
- ba’zi dorilarni qabul qilish:
Shuningdek, teri pigmentatsiyasi organizmning vitamin va ferment balansi bilan chambarchas bog‘liq. A, C va PP vitaminlari yetishmasligi melanin ishlab chiqarishni oshiradi va B vitaminlari yetishmasligi uni kamaytiradi.
Giperpigmentatsiyaning oldini olish mumkinmi?
- Avvalo, har doim maksimal himoya faktoriga ega bo‘lgan yuz quyosh kremidan foydalaning. Endi SPF 50 bo‘lgan nafaqat kunlik parvarish kremlari, balki tonal kremlar va hatto, upalar ham mavjud.
- Yozda ham, qishda ham terini quyosh ta’siridan himoya qilish juda muhimdir.
- Burun, peshona yoki iyagingizga bo‘lar-bo‘lmasga qo‘l bilan tegmang: barmoq himoya qoplamasini o‘chirgan joyda dog‘ paydo bo‘ladi.
- Yuzingizga soya tushiradigan shlyapa kiying.
Pigment dog‘laridan qanday qutulish mumkin?
Yozda yuz terisi uchun murakkab kosmetik muolajalar va texnikalar o‘tkazish mumkin emas. Quyosh yozdagidek faol bo‘lmagan vaqt — kuzgacha kuting.
Ayni paytda dorixona kosmetikasi turlari orasidan teri uchun maxsus mahsulotlarni tanlashingiz mumkin. Qaysi tarkibiy qismlarga e’tibor berish kerak?
Masalan, retinoidli mahsulotlar — A vitaminining hosilalari — teri hujayralarining yangilanish jarayonini tezlashtiradi va husnbuzardan keyingi izlarga va hatto, yoshga bog‘liq doimiy pigmentatsiyaga qarshi kurashda yordam beradi.
C vitamini yuqori bo‘lgan mahsulotlar epidermisning yangilanishiga hissa qo‘shadi, kollagen sintezini tezlashtiradi va pigment dog‘larini bartaraf etishga hissa qo‘shadi.
Arbutin moddasini o‘z ichiga olgan mahsulotlar. Kelib chiqishi tabiiy bo‘lgan bu oqartiruvchi komponent turli shifobaxsh o‘simlik ekstraktlaridan olinadi. Arbutin melanin sintezida ishtirok etadigan asosiy ferment bo‘lgan tirozinazani bloklaydi.
Kislotalar (glikolik, sut, olma va hokazo) bo‘lgan vositalar terining yangilanishini tezlashtiradi va pigmentatsiyani sezilarli darajada oqartiradi.
Izoh (0)