O‘zbekiston hukumati Yaqin Sharq va Janubiy Osiyo mintaqalariga elektrotexnika mahsulotlari eksportini oshirishga intilmoqda. Bu haqda O‘zbekistonning Qatardagi elchixonasi iqtisodiyot bo‘yicha maslahatchisi Mahmud Mahmudov Qatar Tribune nashriga bergan intervyusida maʼlum qildi
Mahmudovga ko‘ra, O‘zbekiston rasmiylari o‘z oldiga elektrotexnika mahsulotlari eksportini anʼanaviy bozorlar, jumladan, Yaqin Sharq, Janubiy Osiyo va Yevropa bozorlaridan tashqari yangi bozorlarga ham joriy qilish maqsadlarini qo‘ygan. Bu borada esa O‘zbekistonga berilgan GSP+ imtiyozli savdo rejimini nihoyatda katta yordam beradi.
O‘zbekiston vakili Qatar Tribune nashriga bergan intervyusida 2023-yil sentabr oyida qabul qilingan “O‘zbekiston – 2030” strategiyasi Yangi O‘zbekistonni rivojlantirish strategiyasida belgilangan barcha maqsadlarning bajarilishini taʼminlashini taʼkidlagan. Bu yo‘lda mamlakat o‘z tamoyillariga sodiq qolishi, do‘stlik va savdo munosabatlarini barqaror rivojlantirishi aytilgan.
Manbada aytilishicha, O‘zbekiston prezidenti so‘nggi yetti yil davomida elektrotexnika sanoati korxonalariga bojxona va soliq imtiyozlari, transport va boshqa xarajatlarni qoplash uchun subsidiyalar berishni nazarda tutuvchi bir qancha qonun hujjatlari qabul qilgan. Bu esa amaliy ahamiyatga ega bo‘lib, tarmoqning gurkirab o‘sishi uchun katta shart-sharoitlar hozirlagan.
Mahmudov bergan maʼlumotga ko‘ra, O‘zbekistonda mingga yaqin elektrotexnika sanoati ishlab chiqarish korxonasi faoliyat yuritmoqda. Ularning aksariyati kichik korxonalar bo‘lib, 2 ming turdan ortiq mahsulot ishlab chiqarmoqda. Sanoatdagi deyarli barcha korxonalar xususiy mulk bo‘lib, sohada band bo‘lganlarning umumiy soni 35 ming kishidan oshadi.
76 ta yirik ishlab chiqarish subyektining 18 tasi elektr simlari va kabellari, 27 tasi maishiy texnika, 32 tasi quvvat transformatorlari va boshqa elektrotexnika mahsulotlari ishlab chiqarmoqda. Har yili yangi ishlab chiqarish quvvatlari o‘rnatilmoqda.
Xabarda aytilishicha, 2022—2026-yillarda Yangi O‘zbekistonni rivojlantirish strategiyasida 2026-yilga borib sanoat ishlab chiqarishini 1,4 barobar, jumladan, elektrotexnika sanoatida yuqori qo‘shimcha qiymatga ega mahsulotlar ishlab chiqarishni 2 barobar, eksport hajmini esa 3 barobar oshirish ko‘zda tutadi.
So‘nggi yetti yilda sohaga jalb qilingan investitsiyalar hajmi 935 million dollarni tashkil etgan. Shundan 400 million dollarga yaqini to‘g‘ridan to‘g‘ri xorijiy investitsiyalar hisoblanadi.
Bundan tashqari, umumiy qiymati 800 million dollardan ortiq bo‘lgan 260 dan ortiq yangi investitsiya loyihalari, jumladan, 120 million dollarga baholangan 50 ta kabel ishlab chiqarish sohasi bo‘yicha loyihalar, 380 million dollarlik 115 ta maishiy texnika ishlab chiqarish loyihalari, 60 million dollar qiymatdagi 40 ta energetika loyihasi hamda 250 million dollarlik 58 ta boshqa muhandislik loyihalari ishga tushirildi”, degan Qatardagi O‘zbekiston rasmiysi.
O‘zbekiston elchixonasining iqtisodiyot bo‘yicha maslahatchisi 2017-2023 yillarda elektrotexnika sanoatida ishlab chiqarish hajmi 7,1 baravarga oshib, 1,98 milliard dollarga yetganini, jumladan, simlar, kabellar va mis mahsulotlari ishlab chiqarish 5,5 barobarga oshib, 792 million dollarga yetganini maʼlum qilgan; maishiy texnika sohasi 8,2 baravarga oshib, 633 million dollargacha, texnik jihozlarga xizmat ko‘rsatish esa 9,3 barobarga oshib, 567 million dollar qo‘shimcha daromad keltirgan.
Taʼkidlash joizki, maishiy texnika eksportining sezilarli o‘sishi (10 baravardan ortiq) Artel Electronics kompaniyasi tomonidan O‘zbekistonda yangi ishlab chiqarish quvvatlarini yaratish hisobiga sodir bo‘ldi. Xususan, muzlatgichlar eksporti hajmi 15 baravar oshib, 58 million dollarga, televizorlar 6 barobarga oshib 52 million dollarga, elektr plitalar savdosi 4,5 barobarga oshib 40 million dollarga, kir yuvish mashinalari 5 barobarga oshib 20 million dollarga, konditsionerlar eksporti esa 4 barobarga ko‘payib, 15 million dollarga yetdi, degan O‘zbekistonning Qatardagi rasmiysi.
Izoh (0)